Mga piniriso sa CPDRC gihagit

“If they have a case against me, file it.”

Kini ang hagit ni Roberto “Bobby” Legaspi, acting warden sa Cebu Provincial Detention and Rehabilitation Center (CPDRC) batok sa mga piniriso nga wa kauyon sa iyang pagdumala sa provincial jail.

Siya nihagit usab sa mga bilanggo nga gusto nila matangtang siya sa pacilidad, moadto kini diretso kang Gobernador Hilario Davide III.

“If they want me out, then go straight to the governor, let him replace me,” pahayag ni Legaspi dihang nahinabi sa Superbalita Cebu.

Iya kining hagit human niduso og petition ang mga piniriso ngadto sa Kapitolyo niadtong Martes pinaagi sa ilang gikuha nga manlalaban nga si Inocencio de la Cerna.

Wa siya makauyon sa petition kay alang niya kon dunay tuyo ang mga bilanggo duna silay bosyo nga magsilbi nila nga tigpamaba tali sa warden.

Sa petisyon, nireklamo ang mga bilanggo sa subli nga pagsuspenso sa dalaw ug ang plano nga dili na ipabutang sa prisohan ang kita sa ilang kooperatiba.

Ang mga piniriso nipadayag usab nga mas maayo dunay makasulod nga mga sakop sa media atol sa sunod nga mga greyhound operation ug dili sila limitahan sa inventory ug presentasyon sa nakuha sa operasyon.

Niadtong Pebrero 7, gisuspenso ni Legaspi uban sa pagtugot ni Davide, ang dalaw ug conjugal visit sa CPDRC human 26 ka mga pakite sa gidudahang shabu, drug paraphernalia ug ubang kontrabando ang nasakmit atol sa greyhound operation sa Philippine Drug Enforcement Agency ug Provincial Public Safety Company.

Si Legaspi nipasabot nga kinahanglan niya suspensuhon ang dalaw aron matan-aw kon kumusta na ang iyang gipatuman nga seguridad sa dihang siya pa ang nagdumala sa pacilidad kaniadto sa wala pa molingkod sa pwesto ang kanhi warden nga si Audesti Miguel.

Ugma, mabalik na ang dalaw ug conjugal visit sa provincial jail.