Di lang NFA ang palitan og bugas sa Kapitolyo alang sa mga bilanggoan, ubang pasilidad

Giklaro sa Provincial General Services Office (PGSO) nga wala gi-limit ngadto sa National Food Authority (NFA) ang palitanan sa suplay sa bugas sa Kapitolyo, ilabi na sa gidumala niini nga Cebu Provincial Detention and Rehabilitation Center ug Provincial Social Welfare and Development Office (PSWDO).

Niining isyu labot sa pagnihit sa suplay sa NFA rice, gipadayag sa PGSO nga mahimo silang mopalit og commercial rice, alang sa konsumo sa mga piniriso ug gamiton alang sa assistance o relief operation.

Gipasabot ni PGSO Head Jone Sepe nga ang gihimo nga pagpalit sa probinsiya og rice supply sa NFA gitumong aron pag-suporta sa ahensiya ug aron mas mapadali ang transaksiyon kay dili na man moagi sa bidding ang government-to-government transaction.

Giklaro niya nga wa’y naglimit sa Kapitolyo nga mopalit niini ngadto sa laing supplier, ilabi na kon dunay emerhensiya o magnihit na ang suplay sa NFA.

Bisan og gidumala sa probinsiya, mohimo og kaugalingon nila nga purchase ang CPDRC sa bugas nga maoy ipakonsumo sa mga piniriso ug ang PSWDO alang sa mga posibleng relief operation ug sa ilang paghatag og assistance.

Apan niining sitwasyon sa NFA, diin nagnihit ang ilang suplay tungod sa wala pa pagabot sa gi-import nila nga bugas, maapektohan ang operasyon sa CPDRC ug PSWDO.

Kon dili na maka-supply og bugas ang NFA, gitumbok ni Sepe nga mahimong mopadagan ang Kapitolyo og purchase request alang sa pagpalit og commercial rice.

Mahimo kining dili na moagi sa bidding kon dinalian ang panginahanglan niini.

Wala pa makadawat og pormal nga pahibalo ang PGSO gikan sa NFA labot sa pagnihit sa ilang suplay ingun man pahibalo gikan sa CPDRC nga dili na magdugay ang kasamtangan nilang stock sa NFA rice.

Hinuon, matod ni Sepe, mahimong ipagamit sa prisohan ang stock sa bugas sa PSWDO, nga naa sa ilang bodega.

Nasayran, nakahuwam og 70 ka sako sa NFA rice ang CPDRC sa PSWDO ug laing 50 ka sako sa bugas sa buhatan ni Bise Gobernador Agnes Magpale. Ang CPDRC inmates mokonsumo og 30 ka sako o 1,500 kilos sa bugas matag adlaw.

Matod ni Acting Warden Bobby Legaspi, molungtad pa hangtud sa Lunes ang maong suplay. Andam na hinuon ang tseke nga maoy ilang ipalit og dugang NFA rice sa sunod semana. Hinuon mag-agad kini sa stock sa NFA.