Mga manindahay sa Tabunok hapit na makabalik

Mga manindahay sa modernong merkado sa Tabunok, dakbayan sa Talisay hingpit na unyang makabalik sa ilang pagpaninda sulod na sa merkado.

Apan hangtod karon, ang market committee wala pa makahukom kon unsa nga pamaagi ang ilang pag-award sa mga manindahay alang sa ilang puwesto.

Sa miaging buwan, giinugurahan ang modernong merkado sa Tabunok nga migasto og dul-an sa P200 milyunes.

Si Mayor Eduardo Gullas una nang namahayag nga aron patas ang tanan, ipaagi sa raffle ang paghatag nilag puwesto aron mawala ang pagduda nga adunay gipaburan.

Matod ni City Administrator Atty. Rudelyn Navarro, ang chairman sa gitukod nga market committee, nga kon dili karong sunod semana, labing siguro karong petsa 20 ila nang i-award ang mga puwesto sa mga manindahay.

Iyang gibutyag nga gikan sa fish and meat section, dry goods general merchandise ug mga opisina sa ibabaw nga bahin, dul-an usa ka libo ka mga manindahay ang makabalik sa merkado.

Apan kon unsa nga pamaagi nga maangkon sa mga manindahay ang ila unyang puwesto, kini maoy wala pa matino.

Matod ni Navarro nga magtagbo pa sila pag-usab aron hingpiton ang ilang masabotan kon ipaagi ba sa raffle nga maoy una nang giluwatan sa mayor.

Aduna usay sugyot nga ang committe maoy motumbok kon asa ang puwesto sa mga manindahay ug usa sa ilang nahunahunaan nga kadtong mga maayog record sama sa maayong mobayad sa ilang buhis, naka-renew sa ilang mga business permit ug dugay na kaayong naninda sa merkado maoy prayoridad.