Walay demolition order sa Dumlog

Nihimakak ang Assistant City Legal Officer (CLO) sa dakbayan sa Talisay nga niisyu og demolition order alang sa usa ka balay sa Barangay Dumlog.

Usa ka Perigrina Gutierrez, taga Barangay Dumlog, ang nagplanong modangop sa Visayas Ombudsman human niya pasanginli ang Talisay City Legal Office nga niisyu og demolition order bisan ang kaso padayon pang gihusay sa korte.

Si Gutierrez nipasangil nga ang iyang balay sa Dumlog giguba sa mga pamilyang Seno nga iyang gikaaway sa korte pag-angkon sa luna nga dul-an usa ka libo ka metro kuwadrado.

Matod niya nga tinuod aduna silay kaso sa ilang yuta og napildi na sila sa sala ni Judge Mario Manayon apan, ila pa kining giapelar ngadto sa Court of Appeals.

Apan si Atty. Marc Arthur Bas, assistant CLO, nipaklaro nga ang iyang gihimo mao lang ang pagnotaryo sa maong dokumento sanglit usa man kini sa mga proseso sa demolition permit.

Iyang gipasabot nga bisan kinsang abogado mahimong makanotaryo niini, apan nahitabo lang nga siya ang giduol hinungdan nga naduhig ang pangan sa ilang buhatan.

Nagkanayon si Atty. Bas nga human sa iyang pagnotaryo, daghan pang proseso nga agian, ngadto sa Office of the Building Official ug sa Engineering Department.

Si Bas niingon nga posibling gilaktod lang sa pamilyang Seno ang ilang gihimong pagguba bisan og wala pa makompleto ang dukomento.

Ang Engineering Office, gipangulohan ni Engr. Gamaliel Vicente Jr., niklaro nga wala pa sila makadawat sa maong dukomento gikan sa pamilyang Seno nga nagpasabot nga dili pa kini kumpleto tungod kay daghan pa kinig i-comply nga papelis.

Matod ni Vicente nga mahimong ilegal ang gihimo sa pamilyang Seno, gani mahimo silang makiha mismo sa Talisay City Hall tungod sa ilang pagguba na sa maong balay.

Sa ilang bahin, ang mga opisyal sa Dumlog kinsa giingong nipadalag mga tanod sa lugar nga gikuwestyon usab sa reklamante, niklaro nga dili sila makaisyu og permit hinuon usa lang ka clearance ug wa silay giisyu nga demolition permit.

Ilang giklaro nga ang pamilyang Seno nangayo kanilag assistance sa pagguba tungod kay gipahibawo usab sila nga aduna na silay gihuptan nga demolition order, apan ila ra usab kining gipabalik sa barangay hall.