Paubsan ang edad

Nagubot ang pipila ka mga tag-iya og pribadong sakyanan sa Barangay Labangon ug Tisa human nila madiskobrehi nga kini gipasiritan og pintal. Biktima sa vandalism ang ilang mga sakyanan. Ang nagbuhat? Pulos mga menor de edad. Kini nga hitabo usa lang sa daghang mga kutay sa di maayong mga binuhatan sa mga menor de edad, kinsa nagsalig nga di sila mapriso tungod sa ilang edad.

Pila na man ka mga menor de edad ang “na-rescue” tungod kay gipanggamit nga mga drug courier sa mga sindikato sa drugas? Naay uban gigamit usab sa mga kawat ug uban pang mga krimen.

Di usab mangahadlok kining mga bata sa pagbuhat og krimen kay nakahibawo sila nga di bilanggoan ang ilang sangkoan.

Unta, gitinuod ang mga lakang nga paubsan ang edad sa mga menor nga mahimong bilangguon kay mao ra kini ang makapahadlok sa pagbuhat nila og mga krimen. Pabug-atan usab ang silot niadtong mga tawo nga manggamit sa mga bata sa ilang pagbuhat sa krimen, sama kabug-at niadtong naghimo og human trafficking.

Mas maayo gani nga ilhon nga heinous crime ang paggamit og mga bata sa paghimo og mga krimen, labina sa drugas, pagpanulis ug uban pa.

Tingali, pinaagi niini, magpanagana na ang mga bata ug kadtong naandang nangggamit kanila.

Sa nasod man gud nga kabus, sama sa Pilipinas, kuwang kaayo sa mga pasilidad ug uban pang mga suporta sa programa alang ning mga bata nga makalapas sa balaud.

Maayo lang kini sa mga nasod nga adunahan nga dunay igong pundo nga makalusad og mga programang nagsuporta alang sa kaayuhan sa kabataan.

Samtang sa nasod, nagsige pag debate kon unsay buhaton unya daghan sa mga menor ang way puas nga naghimo og mga krimen kay lugak ang balaud alang kanila ug naggamit nila.