Maoy labing gamhanan

Ang naka-porke aning ‘kanhi laos nga pulitiko’ dili maminaw sa sentimento sa katawhan, dili maminaw og tambag kay sa iyang pagtuo siya ray labing nakamao ug siya ray labing utukan. Dili lang kay morag diktador siya kon dili diktador na gyud. The more nga supakon kining iyang mga kuwestiyonable nga mga polisiya ug pamalaod, the more nga mobarug siya aron iyang ikapamatuod nga siya labing gamhanan.

Dugay nang midemanda ang taga oposisyon nga bungkagon ang Barangay Mayor’s Office (BMO) nga gipamutang sa ‘kanhi laos nga pulitiko’ sa mga barangay kansang mga barangay captain iya sa oposisyon. Karong bag-o, nipalabang og resolusyon ang mga opposition councilors kabahin sa ilang panawagan. Apan mibarug ang ‘kanhi laos nga pulitiko’ nga dili niya bungkagon ang BMO.

Ikaduha, kabahin aning kontrobersiyal nga counterflow, nipagawas siyag executive order nga hingusgan ang pagsikop aning mga abusadong drivers nga mag-counterflow. Dili lang multa ang ipahamtang sa driver, kon dili i-impound pa ang sakyanan balig 30 ka adlaw. Gawas nga kuwestiyonable ang legalidad sa EO, iya gyud nga ipadayon nunot sa pagsupak sa publiko kabahin sa pagpahamtang og multa nga pag-impound.

Sa miaging adlaw iyang gikuwelyohan ug giliaban ang court sheriff nga igo lang nagptuman sa demolition order sa mga lomolopyo sa sitio San Roque sa Capitol Site. Iya pang gikasab-an nga morag nangasaba og iyang saop dala ang hulga nga iyang gukdon hangtod sa hangtod. Tan-awa og unsa ka mangginukdanon kining maong tawo. Unsa may sala ni court sheriff Elcid Caballes nga igo lang nagtuman sa mandatu sa korte?

Nunot sa mga pagsaway sa publiko labi pa sa mga abogado, nanghagit na hinuon siya nga ikiha siya kay andam niyang atubangon bisan kon ang korte mokiha. Tan-awa og unsa ka mahawod-hawuron. Morag siya nay labing gamhanan ning kalibutana. Di motuo ug morespotar og husgado. Maayo siguro nga ato siyang pahinumduman sa kinabuhi ni Alexander the Great. Sa sunod isyo karong Martes, akong isugid ang kinabuhi ni Alexander the Great.