Tomas ug Sara

Makapahimuot kining giinsister sa mga tigsuporta sa oposisyon nga igo lang nagsunodsunod si Mayor Tomas Osmeña kang Mayor Sara Duterte dihang gikwelyohan sa mayor ang court sheriff sa miaging Huwebes.

Mura man gud og wala makaila ang mga Sugboanon sa kinaiya ni Mayor Osmeña kon masuko kini.

Dihang nakita nato ang maong video nga nakuha ug gi-upload sa Facebook sa usa ka magsisibya sa radio, nilihok dayon ang makinarya sa social media sa oposisyon dinhi sa Syudad sa Sugbo ug usa sa ilang mga punto nga nagsunodsunod lang si Tomas isip preparasyon sa eleksyon.

Maglibog lang sab ko kay ang umaabot piliay karong Mayo 2018 alang man sa barangay.

Pero sigi na lang. Di lagi sakop si Tomas sa PDP-Laban, apan klaro sa video ug sa mga hulagway sa insidente nga pareho siya og kinaiya sa kang Mayor Sara kon maghisgot na ta og pagdapig sa mga kabus nga nag-atubang og demolisyon.

Pareho silang Sara nga di magduhaduha sa ingon niadto nga sitwasyon diin giapil na sa demolition team ang pagguba sa mga struktura nga gawas na sa court order.

Kon wala pa si Tomas nga nibabag sa court sheriff, hayan nahurot na ang tanang balay sa maong lote nga gustong angkunon sa usa ka adunahang negusyante.

DIGONG

Unsa kahay tuyo ni Presidente Rodrigo Duterte nga iya mang gipundok dinhi sa Syudad sa Sugbo ang tanang mga gobernador ug mayor dinhi sa Sugbo ugmang adlawa.

Si Digong mismo moatubang kanila diha sa Radisson Blu Hotel. Tulo ka punto ang akong pangagpas.

Una, paborito ni Presidente Duterte ang paghisgot kabahin sa iyang kampanya batok sa gidiling drugas.

Ambot kon padayon pa ba niyang hisgutan si kanhi mayor Mike Rama isip druglord protector. Mahimo man diayng mawagtang sa listahan, sama sa nahitabo sa Ilo-ilo, kon motapon sa PDP-Laban.

Ang problema lang ni Rama, sa akong tan-aw, kay si Presidential Assistant for Visayas Mike Dino tua na man nipusta kang Bise Mayor Ed Labella.

Ikaduha, posibleng makusganong iduso ni Presidente Duterte sa mga gobernador ug mayor ang kabahin sa pederalismo.

Sa pagkakaron, daw naguna ang mga mayor sa Sugbo kabahin niining pederalismo. Salamat kang Secretary Addy Sitoy ug Mayor Aljun Diamante sa Tuburan nga nagtukod niining Cebu Movement for Federalism kun CemFed.

Gani, dakong tigum ang gipahigayon sa CemFed diha sa Syudad sa Naga kagahapon.

Gawas sa mga mayor, suportado pa gyud ang kalihokan ni Kong. Samsam Gullas.

Ikatulo, dako ang posibilidad nga hisgutan ni Duterte ang mga proyekto sa iyang adminisrasyon dinhi sa Sugbo.