6TH STARTUP WEEKEND PROGRAM GIPAHIGAYON
Ipahigayon ang 6th Startup Weekend Cebu Youth Edition karong Pebrero 16 hangtod Pebrero 18 sa The Grid Pad and Creative Campus, Barangay Talamban, dakbayan sa Sugbo.
Ang tulo ka adlaw nga idesyon, mentorship, ug presentasyon nga programa mao ang ika-6 ka tuig sa Startup Weekend Cebu ug ang unang Youth Edition sa Pilipinas.
Adunay gidahom nga mga partisipante dul-an 60 ka mga estudyante gikan sa Grade 9 hangtod Grade 12 ug anaa sa 13 hangtod 18 ang pangedaron.
Ang programa magsangkap ug makapahimo sa kabatan-onan nga makasinati sa mga lainlaing panaw isip usa ka negosyante sulod sa 54 oras nga kalihokan.
Sama sa global program sa Startup Weekend, naglangkob kini og pakighimamat, pitching, team up sa unang adlaw kon diin ang mga partisipante adunay 60 ka segundo aron pag-pitch, pagpili sa ilang proyekto, ug pagtukod og teams.
Sa ikaduha nga adlaw, ang mga partisipante hatagan og mga kabtangan ug suporta aron mapalambo ang ilang presentasyon. Ang lokal nga mga mentor anaa sab sa tibuok nga panghitabo aron magcoach kanila.
Sa ikatulo ka adlaw nga motapos ang programa, diin ang mga koponan anaa sa atubangan sa panel of judges aron mopresentar sa ilang proyekto.
Aduna kini 3 kabuok bahin nga gitawag nila og hacker, hipster, ug hustler. Ang hacker mao ang grupo sa kabatan-onan nga hilig sa teknolohiya, gadgets.
Ang hipster sab mao ang hilig sa mga lainlaing designs sama sa pagmugna og mga pixels ug uban pa samtang ang hustler mao ang sales guy, ang hilig makighinabi og mga kustomer.
“It only makes sense that Cebu is a gold mine of talent, ideas, and entrepreneurs – participates in this movement. This Startup Weekend edition is a special because this is exclusive to the youth, with the goal of inspiring interest in technology, design, and entrepreneurship,” matod pa ni Justine Canete, Lead Organizer sa Startup Weekend Cebu Youth Edition.
Magpahigayon sab sila og eksaminasyon atol sa programa ngadto sa mga partisipante kon diin makita sab nila kon asa sila nga bahin naangay.
Adunay registration fee nga P1,000 sa pag-apil nga naglakip og 6 kabuok meals, usa ka event shirt, event goodie bags, ug ang kasinatian aron masabtan kon unsa ang gikinahanglan sa pagmugna og tinuod nga solusyon sa negosyo, pagtrabaho sa usa ka modelo sa negosyo, ug paghimo og Minimum Viable Product sulod sa usa ka semana.
Usa ka pre-event diin libre ang mga workshop mahitabo karong Pebrero 10 ngadto sa Grid Pad and Creative Campus, Talamban, Cebu agi sab sa pagpangandam sa main event.
Mamahimong mo-register ang mga interesado moapil sa programa pinaagi sa ilang Facebook Page nga Startup Weekend Cebu.