'WONDER WOMAN' SI KAP
Nasurprisa si Altea Racuya Lim sa giandam nga party sa iyang mga sakop sa barangay hall alang sa kasaulogan sa ika-51 nga kasumaran sa iyang adlaw nga natawhan niadtong Enero 26, 2018.
“Nalipay kaayo ko, na-surprise jud ko sa ilang effort. Nagamot-amot ang staff sa barangay for the food,” asoy sa babaye nga kapitan sa Barangay Poblacion Pardo, siyudad sa Sugbo.
Gipundok sa mga staff sa barangay ang mga tinun-an sa day care, persons with disability, barangay health workers, may mga senior citizen usab ug ubang mga bisita nga niduyog sa kasaulogan.
Matod ni Altea, gawas nga nakauban niya ang mga konstituwente sa barangay ug mga higala, espesyal usab ang iyang birthday karong tuiga kay nakahalad siya og sayaw alang sa balaang bata nga si Señor Santo Niño.
Siya nisaysay nga unang higayon kini nga gisaulog ang iyang birthday sa ground sa barangay hall diin kaniadto adto ra sila sa taas sa barangay hall magsalo-salo.
Ang iyang mga sakop, naghimo og gamay nga stage atubangan sa barangay hall diin dunay mga imahen sa Señor Santo Niño ug gidekorasyonan og pungpong sa mga buwak.
Sa party, nanayaw sila og Sinulog ug gisunod ang salo-salo sa pagkaon.
Dili lang usa ka adlaw ang selebrasyon sa iyang birthday kondili duha ka adlaw, kay pagka ugma niana laing surprisa ang giandam alang sa kapitan, kini dungan sa ilang Christmas party pagka gabii niadtong Enero 27 sa barangay gym.
Nalangay ang ilang Christmas party og kapin sa usa ka buwan human ang pipila ka pundo sa barangay ang giingong gidala sa ilang treasurer nga si Christopher Idul, nga wala na magpakita.
Sa iyang birthday, nipasiaw si Altea nga gusto niya mosul-ob og sinina sa Wonder Woman.
Apan giingnan siya sa iyang kamanghuran nga anak nga si Danni Ann Rose, 13, nga dili na siya angay mosul-ob og Wonder Woman costume kay alang niini usa ka Wonder Woman ang iyang inahan sa ilang pamilya ug barangay.
“Ikaw ang nag-defend sa mga tawo. You are strong enough, dili jud ka mahadlok. For me, Wonder Woman ka,” pulong ni Danni ngadto sa iyang inahan nga gisaysay sa kapitan sa Superbalita Cebu.
Apil sa mga gasa nga iyang nadawat sa birthday, ang cakes, bags ug bouquet sa mga buwak gikan sa iyang mga klasmeyt sa kolehiyo sa kursong Architecture sa University of San Carlos. /