HEAT MIINIT
Nanginit ang host Miami Heat sa pagbalik ni Dywane Wade ug ilang gipangsugba ang bisitang Milwaukee Bucks, 91-85, kagahapon sa National Basketball Association (NBA).
Si Wade, kinsa sulod sa 21 ka mga buwan nga nagduwa sa Chicago Bulls dayon sa Cleveland Cavaliers, igo ra man tuod nimugna og tulo ka mga puntos sulod sa 22 ka mga minutos nga pagduwa apan ang iyang presensya igo na aron madasig ang tiuok puwersa sa Heat.
Ang Heat, nga nakabangon gikan sa lima ka sunodsunod nga kapildihan, gipangulohan ni Tyler Johnson pinaagi sa iyang 19 puntos, nihatag og 16 puntos si Josh Richardson, nidugang og 15 puntos si Bam Adebayo samtang nitampo og 12 puntos ug 16 rebounds si Hassan Whiteside.
Ang Bucks gipangulohan ni All-Star forward Giannis Antetokounmpo pinaagi sa iyang 23 puntos ug 11 rebounds samtang nitunol og 19 puntos si Eric Bledsoe.
Si Wade usa sa unom ka mga magduduwa nga gi-trade sa Cavaliers sa miaging adlaw atol sa trading deadline. Sa Atlanta, nagpakatap og
triple-double si LeBron James samtang nimugna og kaugalingon niyang season-high nga 30 puntos si Kyle Korver aron agakon ang Clevelan Cavaliers sa bangis nga kadaugan batok sa host Hawks, 123-107.
Nahitabo kini usa ka adlaw human gipang-trade sa Cavaliers ang unom nila ka mga magduduwa.
Si James nimugna og 22 puntos, 17 assists ug 12 rebounds alang sa Cavaliers samtang nidugang og 24 puntos si Jeff Green.
Wala pa man tuod nanuwa ang bag-ong mga sakop sa Cleveland nga sila si George Hill, Jordan Clarkson, Larry Nance Jr. ug Rodney Hood apan ang paningkamot nila ni James, Korver ug Green igo na aron agakon ang Cavaliers.
Ang Hawks gipangulohan ni Dennis Schroder pinaagi sa iyang 25 puntos samtang niamot og 15 puntos si Taurean Prince.
Sa laing mga sangka, ningdaog ang Los Angeles Clippers batok sa Detriot Pistons, 10895, Philadelphia 76ers batok New Orleans Pelicans, 100-82, Indiana Pacers batok Boston Celtics, 97-91, Houston Rockets batok Denver Nuggets, 130-104, Utah Jazz batok Charlotte Hornets, 106-94, Chicago Bulls batok Minnesota Timberwolves, 114-113, ug Portland TrailBlazers batok Sacramento Kings, 118-110.