LTFRB 7 mikanselar sa prangkisa sa Inner J Tourist

Gikansilar sa Land Transportation Franchising and Regulatory Board sa Central Visayas ang tanang upat ka mga prangkisa sa operator sa van nga nalambigit sa aksidente sa lungsod sa Alegria niadtong Enero 20 diin pito ka mga tawo ang namatay.

Sa kamandoan nga pirmado ni LTFRB 7 Director Ahmed Cuizon, ang Inner J Tourist nga nakapangan ni Joseph Pangatungan, gidid-an na nga maka-operate og mga publikong sakyanan sa tibuok niya nga kinabuhi.

Sa desisyon, si Pangatungan, kapitan sa Barangay Maribago, dakbayan sa Lapu-Lapu, gimandoan usab nga mobayad og P200,000 isip multa sa pag-operate og colorum nga van.

Gitawgan sa Superbalita Cebu si Joshly Pangatungan, anak ni Joseph, apan dili kini ma-contact sa iyang cellphone number.

Ang Certificate of Public Convenience sa naaksidente nga van (AED 1299) nga gimaneho ni Gilbert Dela Cruz ang unang gisuspenso sa LTFRB 7 sud sa 30 ka adlaw sugod niadtong Enero 22.

Ang ahensiya nipatawag ni Joseph aron madungog ang iyang habig kon nganong dili angay kanselahon ang CPC niadtong Enero 31.

Atol sa hearing, nakaplagan nga nitugot ang operator nga magamit sa laing tawo nga si Dela Cruz ang prangkisa pinaagi sa gitawag og "kabit" system arrangement.

Laing nakaplagan nga ni-expire na niadtong Disyembre 13, 2017 ang insurance sa van.

Ang van wa usab marehistro sa Land Transportation Office isip Tourist Transport. Wa usab nahatag nga ayuda ngadto sa mga pamilya sa nangamatay ug ubang kalapasan nga nakit-an.