Wali sa pari nga makapakatug

Nipahinumdom ang usa ka opisyal sa Catholic Bishops' Conference of the Philippines (CBCP) sa pasidaan ni Pope Francis ngadto sa kaparian batok sa mga homily o wali nga makapakatug sa mga nanimba.

Si Fr. Jerome Secillano, executive secretary sa permanent committee on public affairs sa CBCP, niingon nga ang mga wali kinahanglan nga mugbo ug d molapas sa 10 minutos.

Maoy oberbasyon sa Santo Papa nga daghang mga Katoliko nga manimba mangatug lang, magtabi ug ang uban gani mogawas aron manigarilyo atol sa wali sa pari.

Susama ni sa estorya bahin sa usa ka pari ug usa ka driver sa jeepney nga namatay ug ug niatubang kang San Pedro didto sa langit. Ang jeepney driver gipapuyo ni San Pedro sa usa ka mansyon samtang ang pari gipapuyo lang sa usa ka yano nga panimalay.

Nireklamo ang pari ngadto kang San Pedro: “Nasayop man tingali ka Nyor Pedro. Ako nga usa ka pari gihatagan lang nimo og yanong balay, samtang ang jeepney driver nga kusog kaayong mopadagan gihatagan nimog mansyon.”

Tubag ni San Pedro, “Pari lagi ka, pero kada wali nimo, mangatug man ang nanimba. Samtang ang jeepney driver nga kusog kaayong mopadagan, mangadye man ang iyang mga pasahero.”

Niadtong miaging Disyembre, si Fr. Secillano namahayag nga ang mga pari di kinahanglan nga modangop sa “entertaining homilies” sama sa mga entertainer sa mga comedy bar nga magsigi og komedya aron magmata ang mga parokyano, labi na niadtong nitambong sa Misa de Gallo.

Matod pa ni Fr. Secillano, obligasyon sa mga parokyano ngadto sa Ginoo ang pagpabiling magmata aron aktibong makasalmot sa Eucharistic celebration.

Maayo kadtong ubang congregation, kay kon magdukaduka na ang mga tawo mokalit man og siyagit og “Amen” aron makamata ang mga tawo.

Niadtong miaging buwan, si Malolos Bishop Jose Oliveros mipahimangno sa kaparian nga ang mga simbahan di alang sa ballroom dancing sa dihang nigawas ang viral video sa usa ka pari nga nagsayaw uban sa iyang partner sud sa usa ka simbahan sa Plaridel, Bulacan.