Hinuktokan ang maayong ugma

Usa ka sidewalk vendor niasoy nako sa iyang mga kasinatian giunsa niya pagbuntog ang ka kabus aron makapadayon pag-eskwela ang iyang anak sa kolihiyo.

Matod niya lisod ug subidahon kaayo ang iyang sitwasyon taliwala sa kalisod sa panginabuhi karon.

“Kamas kutob sa ginhawa” pulong pa ni Roselyn nga akong nahinabi karong bag-o.

Ang iyang mga pamahayag kabahin sa akong report nga gipahaum sa gitakda nga pagduaw ni Presidente Rodrigo Duterte karong adlawa dinhi sa Sugbo.

Ang pangutana, unsay ilang gusto nga ipaabot kang Presidente Duterte ning iyang pagduaw sa ato.

Ang kang Roselyn dugang pohunan nga ika sustener sa iyang kumprada matag adlaw.

Dunay daghan nga gustong mopalit sa iyang display nga prutas apan gamay ra sab siya ug makumpra kay daginoton ang pohunan.

Unta to kung makumpra siya ug daghan modako sab ang iyang kitaon.

Komon ni nga problema sa mga nagnegosyo nga kuwang ug puhonan.

Hinuon dunay mga programa ang atong gobyerno labot sa mga pahuwam.

Ang uban nga akong nahinabi duna sa'y gustong ipaabot sa Presidente.

Sama sa usa ka pulis nga nagpasalamat sa umento nga nadawat.

Duna sa'y maestra nga nihangyo nga umentohan ang ilang mga suhulan.

Apil natong usa ka security guard nga naglaum nga di sab makalimtan ang kaugmaon sa ilang pamilya pinaagi sa mas taas nga suhulan.

KAUGMAON

Naghinangat na ang pagsira sa klase.

Mao na ni ang panahon nga mag-abot ang galastuhanan nga molanat pa ug taas taas nga panahon.

Una, ang bayranan sa eskwelahan. Unya mosunod ang enrollment paraxsa summer classes ug sa Hunyo.

Mao ni hinuktokan ug maayo di lang sa mga ginikanan apil na sa mga estudyante.

Unta madasig sila nga kung di kaya sa mga ginikanan mangita na karon ug kapaninguhaan unsaon nga makasapi aron ibayad sa enrollment.

Sama sa gibuhat sa ubang tinun-an nga nanarbaho ug sa samang higayon nag-eskwela.

Dalaygon nga buhat nga angayang panag-ingnan sa uban.