Once in a lifetime
Naglagot gyud si Lea nako. Klaro sa iyang nawong nga wa siya mouyon sa akong katarongan. “Nganong manimpalad pa man ka sa tawo nga nangandoy pa lang nga mahimong dato? Look, Yeng. Naa si Carlo nga anak daan og datong mga ginikanan? Naa pa gyuy wheels.”
“Di pagpanimpalad ang akong gihimo, Lea. Nag-agad ko sa pinitik sa akong kasingkasing. Para nako, once in a lifetime ra ang first and true love.”
“True love? You mean tinud-anay na ang gibati mo anang Nick?”
Mikatawa si Lea, anang kinataw-an nga nagdalag biaybiay.
“Kay ngano man diay kon mobati kog ingon ani ngadto kang Nick, Lea? Unsa may daotan ani?
Ambot ba sab ni si Lea, uy! Si Carlo man gyud ang iyang gusto para nako. Tinuod nga anak og dato si Carlo kay duna man siyay kaugalingong awto. Apan mao diay kini ang basehan sa pagpilig trato? Di ba ang himuong boyfriend o kaha girlfriend nag-agad man sa pinitik sa kasingkasing?
“Basta, wa gyud koy gusto anang Nick para nimo, Yeng.”
Sus, ang kanahan mibiya lag kalit nako... Kusog kaayo siyang naglakaw paingon sa gawas sa canteen. Wa gani siya mananghid nako. Mora lang siyag nagbilin og putos. Nakapangawot na lang ko sa akong ulo. Migawas ko sa canteen ug nagdaling migawas sa eskuwelahan kay hapit na mogabii.
Nasugatan ko si Carlo ug ang iyang mga barkada nga nagkatawa, morag nagbiaybiay nako.
“Guwapa man unta, anak pa gyud og dato, pero nagmantinil lang og janitor sa eskol.”
Nagkinataw-anay og kusog sila si Carlo. Klaro nga ako ang ilang gipasabot. Gikusmoran ko sila ug gisulingahan. “Tse!” Nagyawyaw ko sa kalagot. Nagparehas lang sila si Lea. Kini sab si Lea nga close friend man unta nako, inay iya kong suportaran sa akong love kang Nick, naninguha nuon nga buwagan ko si Nick? Pagkasakit gyud. Aw, wa tingali mobatig true love si Lea kay kanunay man lang nag-ilis-ilis og boyfriend?
Pag-abot ko sa among balay, wa pa sila si Mama ug Papa, gabii na niadtong tungora. Aw, ingon man gyud sila ani, kanunay lawom nang gabii mopauli kay nagsigeg atiman sa ilang mga negosyo sa siyudad. As usual, nag-inusara na sab kong nanihapon nga gisilbihan sa among katabang.
(SUMPAYAN)