Nietes 90% na'ng andam
Minneapolis - Anaa na sa 90 porsiyento ang kaandam ni International Boxing Federation (IBF) flyweight champion ALA fighter Donnie “Ahas” Nietes alang sa umaabot niyang away.
Kini maoy gibutyag ni ALA chief trainer Edito Villamor sa SunStar Superbalita sa online chat.
Si Nietes, kinsa maoy kasamtangang longest Filipino world champion, modepensa na sab sa iyang bakus batok sa kanhi two-division world champion Argentine Juan Carlos “Coton” Reveco karong Pebrero 25 sa Super Fly 2 boxing promotion sa The Forum sa Inglewood, California.
Adunay 40-1-4, 20KOs nga rekord si Nietes samtang si Reveco naghupot og 39-3, 19KOs nga baraha.
“Maayo kaayo ang training camp. Adjusted na si Donnie sa climate sa Los Angeles ug time zone sa pagtulog. Naa na sa 85-90 percent ang iyang training,” matod ni Villamor.
Si Nietes kasamtangang hugot nga nagbansaybansay sa Wild Card gym ni Freddie Roach sa Los Angeles kauban ang Fil-Am nga si Brian Viloria, kinsa usa sa iyang kanunay nga ika-sparring sa training camp.
“By the time nga maabot ang fight, 100 percent ready na,” dugang ni Villamor.
Sa samang promosyon, si Viloria (38-5, 23KOs) mopakita sab og aksyon batok kang Artem Dalakiam (15-0, 15KO) sa Ukraine.
Ang tagsatagsa ka away nila ni Nietes ug Viloria ang top supporting fights sa boxing card nga gipasiugdahan Promociones Zanfer, K2 Promotions ug HBO Boxing After Dark.