Hotshots gipintalan sa Elasto Painters

Padayon ang maayong gipakita sa Rain or Shine Elasto Painters sa out-of-town nga kombati ug ilang gipangpukan ang Magnolia Hotshots, 101-95, niadtong Sabado sa Philippine Basketball Association (PBA) Philippine Cup sa Calasiao Sports Complex sa Pangasinan.

Ang Elasto Painters mingsaka sa 5-3 nga rekord samtang ang Hotshots napakyas sa solong liderato ug midakin-as sa 6-3 nga baraha.

Sayo nga nanginit ang opensa sa Elasto Painters ug nakaposte dayon kini’g komportableng labaw sa pagpangulo ni Raymond Almazan.

Hangtod nahuman ang duwa, wala nakatilaw sa labaw ang Hotshots.

Ang Elasto Painters nakapaburot sa ilang labaw hangtod ngadto sa 23 puntos.

Adunay higayon nga mingaksyon paggukod ang Hotshots apan napakgang ra gihapon sila sa Elasto Painters.

Nagbangis si Almazan ug gipangulohan niya ang kadaugan pinaagi sa iyang 23 puntos gikan sa 9-of-11 shooting samtang nidugang og 13 puntos si James Yap, kinsa kanhi sakop sa Hotshots.

Nakatampo sab og 12 puntos matag usa sila si Gabe Norwood ug Ahanmisi alang sa Elasto Painters.

Ang Hotshots gipangulohan ni Aldrech ramos pinaagi sa iyang 27 puntos, nidugang og 15 puntos si Ruben Dela Rosa samtang niamot og 14 puntos si Jio Jalalon.

Puntos matag usa:

Rain or Shine (101) – Almazan 23, Yap 13, Ahanmisi 12, Norwood 12, Tiu 11, Daquioag 9, Ponferrada 5, Borboran 5, Trollano 5, Belga 3, Nambatac 3.

Magnolia (95) – R amos 27, Dela Rosa 15, Jalalon 14, Barroca 10, Sangalang 8, Melton 6, Mendoza 5, Reavis 3.