KERR MIKULIT OG REKORD
Miposte og kasaysayan si coach Steve Kerr human niya naagak ang hosts Golden State Warriors sa dakong kadaugan batok sa San Antonio Spurs, 122-105, kagahapon sa National Basketball Association (NBA).
Ning duwaa, naangkon ni Kerr ang iyang ika-250 nga kadaugan isip headcoach ug siya ang labing dali nga nakaabot niini sa kasaysayan sa NBA.
Narehistro kini ni Kerr sulod lang sa 302 ka mga duwa diin iyang nalabwan ang iyang kanhi coach dihang nagduwa pa siya sa Chicago Bulls nga si Phil Jackson.
Si Jackson nakaabot og 250 ka mga daog sulod sa 346 ka mga duwa.
Hinuon adunay angayang pasalamatan si Kerr ning maong iyang naangkon nga dungog. Gitumbok mao ang iyang kanhi assistant coach
Luke Walton, kinsa miagak sa Warriors sulod sa 39 ka mga daog dihang nagpaalim si Kerr sa angol sa iyang likod.
Nagpasalamat sab si Kerr sa iyang mga magduduwa gikan kaniadto hangtod karon.
“It’s been an amazing 3 1/2 years and hopefully more to come,” matod sa usa sa mga labing sinaligan sa Warriors
nga si Stephen Curry.
“... It’s a lot about him setting the identity and the culture around our team and just being a great people guy. There’s probably a better term for that. He just knows how to relate to each and every one of us players and his coaching staff and you’re building that ultimate trust throughout the organization.” Sa ilang duwa batok sa Spurs, kalit lang nanginit si Klay Thompson sa 3rd quarter aron tabangan ang Warriors nga makadistansya sa Spurs gikan sa sikit nga kombati sa 1st half.
Gimugna ni Thompson sa 3rd quarter ang 10 sa iyang kinatibuk-ang 25 puntos.
Nidugang og 17 puntos matag usa sila si Stephen Curry ug Draymond Green alang sa Warriors, nitampo og 13 puntos si David West, nihatag og 12 puntos si Zaza Pachulia samtang niamot og 10 puntos si Kevin Durant.
Ang kuwangan og tawo nga Spurs gipangulohan nila ni La Marcus Aldridge ug Kyle Anderson pinaagi sa ilang 20 puntos matag usa samtang nitunol og 13 puntos si Manu Ginobili.
Sa laing bahin, dili maayo ang misugat kang Isaiah Thomas sa iyang pagkabalhin sa Los Angeles Lakers gikan sa Cleveland Cavaliers.
Sa labing unang duwa ni Thomas sa bag-o niyang kampo, ang Lakers nasugamak sa 123-130 nga kapildihan batok sa hosts Dallas Maverics.
Si Thomas nimugna og 22 puntos ning duwaa.
Sa laing mga sangkaa, ningdaog ang New Orleans Pelicans batok sa Brooklyn Nets, 138-128 (2 OT), Milwaukee Bucks batok Orland Magic, 111-104, Philadelphia 76ers batok LA Clippers, 11298, Washington Wizards batok Chicago Bulls, 101-90, ug Denver Nuggets batok Phoenix Suns, 123-113.