Wa tumana ang order sa Ombudsman
Daghang kataw-anan nga mga panghitabo sa gobiyerno karon. Dihay suspension order nga gipagawas ang Office of the President aron suspensohon si Overall Deputy Ombudsman Melchor Arthur Carandang tungod sa kaso nga Grave Misconduct human niya ipahibalo ang kunohay record sa deposito sa bangko ni PRRD.
Bawal kini tungod sa Bank Secrecy Act.
Unsay nahitabo? Matod ni Ombudsman Conchita Carpio Morales dili niya tumanon ang maong order ug dili niya suspensohon sa katungdanan si Carandang.
Karong bag-o pa lang, dunay gipagawas nga order si Ombudsman Morales nga nagpapahawa sa pangatungdanan ni Deputy Speaker Gwen Garcia tungod sa kaso sa panahon nga gobernador pa siya sa Cebu. Duna kini kalabotan sa pagpirma sa usa ka kasabotan nga walay pagtugot gikan sa Sangguniang Panlalawigan sa Cebu. Unsay nahitabo? Matod ni House Speaker Pantaleon Alvarez, dili nila tumanon ang maong order ug dili niya ipatuman ang maong suspension order. Ngano man?
Matod ni Alvarez, walay jurisdiction kang Gwen Garcia ang Ombudsman sanglit bugtong ang Kongreso lang ang makadisiplina sa iyang mga sakop.
Mao kini gitawag og Mexican Standoff o stalemate.
Dili nato mahibaw-an sa pagkakaron og unsay mahitabo niining duha ka panghitabo.
Apan dunay nahitabo kaniadto nga susama niini.
Ang nahitabo kang Gwen Garcia karon nahitabo usab kaniadto ni Senador Joel Villanueva.
Dihay gipagawas nga dismissal order ang Ombudsman batok kang Villanueva kalabot sa kaso nga gisang-at batok kaniya sa panahon nga siya pa ang nagdumala sa Tesda.
Wala tumana sa Senado ang maong dismissal order sanglit matod sa mga senador, bugtong ang senado lang ang maka-disiplina sa iyang mga sakop.
Mao kini hinungdan nga hangtod karon, padayon nga gawasnon si Senador Joel Villanueva bisan pa sa order sa Ombudsman nga palagpoton siya sa pangatungdanan.
Buyno, mao kini ang naka-anghit niining tanan.
Ang kaso ni Villanueva nahitabo kaniadtong diha pa siya sa Tesda. Karon Senador na siya. Kon papahawaon man gani siya sa pangatungdanan, angay unta kadtong diha pa siya sa Tesda.
Kon papahawaon siya karon tungod sa iyang kalapasan kaniadtong diha pa siya sa Tesda, mawad-an og bili ang milyon-milyon ka mga buto sa mga Pilipino nga mipili kaniya isip Senador.
Mao usab kining kaso karon ni Gwen Garcia.
Ang reklamo ni Garcia dunay kalabotan sa iyang mga gihimo kaniadtong gobernador pa siya.
Bisan pa sa maong kaso, gipili gihapon siya sa mga katawhan sanglit midaog man siya pagka-kongresista sa Cebu.
Kon palagpoton man gani si Gwen Garcia, angay unta kini buhaton kaniadtong nag-serbisyo pa siya nga gobernador sa Cebu og dili karon nga sakop na siya sa kongreso.
Mao kini ang nakanindot niini. Kon ordinaryo nga mga opisyales sa gobierno, matangtang dayon sa pangatungdanan kon dunay dismissal order ang Ombudsman.
Apan kon senador o sakop ba sa House of Representatives, dili matangtang og magpadayon lang gihapon sa pangatungdanan kay dili man nila tumanon ang dismissal order.
Husto ba kini?