Once in a lifetime

Mikusog ang pagkuba sa akong dughan. Seryuso si Nick, klaro nga nagmatinud-anon siya sa iyang gisulti.

“Pangitag laki nga angay nimo, Yeng. Sakit, uy, ning hitaboa kay love gyud tika. Pero kataw-an ka sa imong mga kaila, sa imong mga friends. Ug ako sab, biay-biayon kay magtuo sila nga kuwarta lang ang giapas ko nimo.”

“Kinsay nag-ingon nimo anang tanan, Nick?” Kahilakon ko.

“Si Lea. Nakig-estorya gyud siya nako. Likayan na kuno tika.”

Kalit nga misaka ang akong dugo sa akong ulo tungod sa kalagot.

“Ayaw pagtuo ni Lea, Nick. Gidaot ka lang niya. Gisugot tika kay love ka nako. Wa ko magtan-aw sa imong pagka tawo, sa imong kahimtang. Maoy akong gisunod ang pinitik sa akong kasingkasing.” Nakahilak na gyud ko. “Ayaw paghlak, Yeng. Di ako ang klase sa laki nga angay nimong hilakan. Likayi na ko. Di gyud ko angay nimo.”

“Di ka ba diay maluoy nako, Nick? Sakit kaayo nako nga magbuwag ta. Nganong si Lea man ang imong gituhoan ug di ako? Si Carlo ang gusto ni Lea para nako maong naninguha siya nga magkabuwag ta. Barogan nato ang atong gugma. Di ta magpada’a kang Lea.”

“Mituo ko nga gimahal ko nimo pero di kini igo aron padayunon nato ang atong relasyon.”

Motubag pa unta ko apan mitindog si Nick ug mibiya nako. Nakabakho na lang ko. Giumod ko ang akong nawong sa duha ko ka mga palad. Dihang medyo miluag na ang akong dughan, gitrapohan ko sa panyo ang akong mga luha. Nagdali kong milakaw. Ang canteen maoy akong gidulong. Ug nakita ko si Lea nga nag-esnak. Gisudyaan dayon nako siya. Nagpanudlo ko sa iyang nawong.

“Nganong gusto ka man gyud nga magkabuwag mi si Nick, ha, Lea? Tingali naibog ka niya, no?”

Nataas gyud ng akong tingog. Wa ko makapugong sa akong kaugalingon tungod sa kalagot ko sa akong amiga.

“Unsay naibog? Siya na lang!”

Dako kaayog katawa si Lea. Kabugnuon na gyud ko niya apan nagpugong lang gyud ko sa akong kasuko.

“Si Carlo ang angay nimo, Yeng. Concern lang ko nimo kay friend ta.”

Misamot ang akong kasuko kay gipamugos gyud ni Lea si Carlo nako.

(SUMPAYAN)