Krusyal nga sangka: GlobalPort vs. TNT
Mga duwa karon: 4:30 pm. Phoenix
vs. Meralco 7:00 pm. TNT
vs. GlobalPort
Krusyal nga panag-engkuwentro nga maoy mogiya ngadto sa sunod round maoy masaksihan karong gabii sa dihang magtigi ang pulos naghingutas nga TNT KaTropa ug GlobaPort sa naghinapos nga elimination round sa PBA Philippine Cup sa Smart Araneta Coliseum.
Ang panagsangka nga sugdan sa alas 7 sa gabii mao modeterminar sa ilang tinguha nga makalabnot og lingkuranan sa Top Eight quarterfinals. Ang Texters mosulod sa korte nga dala ang 4-5 nga baraha samtang ang Batang Pier aduna usay 3-4 nga record.
“We need to break the losing streak. We have to find ways to win the next one. We don’t really have a choice, but to focus on the next game,” matod ni TNT coach Nash Racela nga napatik sa PBA.ph.
Ang Texters nga maoy runner-up ning maong conference sa niaging season, ang nahimutang na karong sa apiki nga habig human napukan sa uwahing mga duwa niini, 72-74, sa Phoenix Fuel Masters,ug 78-93 sa Ginebra Kings.
Tungod niini, ang pagbakwi sa kapildiha sa uwahing duha nila ka nahabiling duwa maoy nakulit karon sa ilang alimpatakan. Ilang ikasangka ang NLEX sa katapusan nilang tahas sa elimination.
Ang Batang Pier aduna pay igong kahigayonan nga makasulod sa sunod round tungod kay aduna pa kini upat ka duwa nga nahabilin. Apan kinahanglan og modaog usab sila niining kombatiha.
Si Coach Pido Jarencio sa GlobalPort nanghinaot nga dili mobahar sa pagpakigkombati ang iyang mga batos.
Siya nagtuo nga ang presensiya ni Jeric Teng nga bag-o lang niyang nakuha makatapak sa luna ni Terrence Romeo kinsa padayon nga nagpaalim sa angol sa tuhod.
Wa pa usay kasiguroan kon makaduwa ba si Troy Rosario sa TNT.
Sa preliminary match, hugot usab nga kombati ang gipaabot tali sa Phoenix ug sa Meralco Bolts nga mag-ilog og puwesto sa quarterfinals.
Ang kadaugan sa Phoenix batok sa Meralco karong hapon makapalig-on sa ilang tsans sa pagpaduol sa quarterfinals sanglit ila na man unya ikauban sa ikalimang puwesto ang Rain or Shine ug Ginebra.
Ang Bolts nga karon nipilit sa ika-11 nga lingkuranan, gustong moputol sa ilang tulo ka sunodsunod nga kapildihan, lakip na ang ilang 85-87 nga pagkapukan sa NLEX Road Warriors niadtong Biyernes.
Lisod gyud alang sa Meralco ang pagpabuhi sa ilang paglaom bisan pa og modaog sila batok sa Phoenix tungod kay kinahanglan nga pildihon nila ang Ginebra karong Dominggo ug ingon man ang Magnolia Hotshots sa Pebrero 24 aron makakapyot alang sa sunod round.