CLAMP GIPUSIL SA TAG-IYA SA AWTO

SAKYANAN ILEGAL NGA GI-PARK SA GEN. MAXILOM; LALAKE MISIBAT

Tag-iya og sakyanan nga gi-clamp sa sakop sa Cebu City Transportation Office (CCTO) human ilegal nga nag-parking kilid sa General Maxilom Extension nipusil sa wheel clamp kagahapon sa buntag.

Ang patrol car sa CCTO nagroving sa General Maxilom Avenue ug nakita nilang PO2 Merlou Mercader, sakop sa Cebu City Traffic Police Group, ug Donald Rivera sa CCTO, ang usa ka Honda City nga dunay plate number DV 9713 sa dihang nag-illegal parking sa kilid sa dalan.

Ila dayon ning gi-clamp tungod sa kalapasan, apan pipila ka gutlo ang milabay, naabot ang tag-iya niini nga lalake ug kalit lang nikuha sa iyang armas ug gipusil ang wheel clamp nga gitaod sa ligid.

Human nadungog ang boto sa taga CCTO, daling nanawag og backup si PO2 Mercader sa pagtuo nga mosukol ang driver tungod sa dala niini nga armas.

Daling miabot ang usa ka team sa Special Weapons and Tactics (Swat) sa dapit, apan nisibat ang lalake sakay sa habal-habal sa wa matino kung asa paingon.

Giguyod ang awto padung sa impounding area sa South Road Properties (SRP) samtang ang sakop sa CCTO ug si Mercader nagpatala sa Mabolo police station.

Sa imbestigasyon nailhan nila nga ang tag-iya sa sakyanan nga mipusil sa wheel clamp mao si Melbert Destriza, 27, taga Labangon, Cebu City.

Matod ni Supt. Conrado Manatad, hepe sa Traffic Police Group, nga ilang pasakaan og kaso si Destriza sa pagpabuto niini sa armas og malicious mischief tungod kay naguba ang wheel clamp nga mobalor og P45,000 nga gipanag-iya sa kagamhanan sa Siyudad sa Sugbo.

“Kay kon wala pa toy pulis nga kauban ang Citom, siguro ko nga mapusilan gyud tong traffic enforcer. Maayo na lang nga dili sila ang gipusil. Kining iyang gibuhat, aw pasakaan gyud nato siya og kaso,” matod ni Manatad.

Nimando sab dayon si Cebu City Mayor Tomas Osmena nga pasakaan og kaso ang mao nga tawo.

“File criminal cases. Impound the vehicle forever, not 30 days until convicted because that is an evidence of the crime”, matod pa ni Osmeña.

Ang tanang patrol cars sa CCTO gipaubanan na ni Manatad og mga PNP personnel tungod sa posibilidad nga mangasuko ang mga tag-iya og sa sakyanan nga makalapas sa balaod trapiko sa Siyudad. /

/ ALLAN CUIZON ■ GIPUSIL: Usa ka traffic aide mipakita sa bahin sa wheel clamp nga naigo sa pagpusil sa tag-iya sa usa ka awtong Honda Civic nga illegal nga gi-park sa General Maxilom extension, dakbayan sa Sugbo kagahapon sa buntag.