SEX PAAGI SA PAGDAWAT OG SAKOP SA GANG

Pakighilawas maoy initiation rites sa mga menor de edad nga buot magpasakop sa “Fam” (millennial term sa gang) nga miresulta sa pagkuyanap sa sexually transmitted infection (STI).

Ang Barangay Pajo sa dakbayan sa Lapu-Lapu nakalista og kapin sa 26 ka mga menor de edad nga nag-edad og 1317 anyos nga dunay infection, apan ang unom lang ang medyo grabe ug gitambalan na.

Nasuta ang maong binuhatan dihang sagunson ang gihimong rescue operation sa Barangay Pajo nga gipangulohan ni Kapitan Junard Chan kay adunay mga batan-on nga naglaroy-laroy o nag-estambay sa usa ka dapit taliwala paglapas sa curfew hours.

Sa pakighinabi ni Chan sa mga batan-on, nabulgar ang pundok ug ang ilang binuhatan alang sa magpa-member sa gang.

Nakurat si Chan sa iyang pagkasayod nga adunay duha ka matang sa initiation rites nga pili-an niadtong aspiring members: pasakitan (pinaagi sa pagbunal og paddle o sagpa-on kon babaye) o palamian (pinaagi sa sex).

Nisamot ang kakugang ni Chan base sa inpormasyon nga iyang nakuha diin kadtong nataptan og STI mag- self-medication pinaagi sa pagtunaw sa whitening laundry bar (coconut base) nga sabon dayon pabukalan sa tubig sa di pa imnon.

Adunay laing pamaagi gamit ang bunga sa lubi o butong nga ilang lungagan ug didto sa maong lungag isulod ang kinatawo sa lalake aron mahumol sa sabaw sa butong.

Kasamtangan adunay unom sa mga na-rescue nga nagedad og 13 ngadto sa 16 anyos ang positibo sa STI ang gipatambalan.

Ang maong mga batan-on gipakuyogan sa ilang ginikanan ngadto sa buhatan sa Department of Health (DOH) aron nga kahatagan og tukmang tambal sa maong sakit.

“Nagsige ta og trace karon, kinsa tong ilang gigamit (sex) atong pangayoan sa identity ug atong reskyuhon aron nga mapatambalan nato,” matod ni Chan sa dihang nahinabi sa Superbalita Cebu.

Apan di tanan nga ilang na-rescue residente sa Pajo sanglit adunay gikan sa barangay Pusok apan sa Pajo naglaroy-laroy.

Mga gang nga nalista sa barangay naglakip sa Pintatonik, Tycoons Chix, Younger Fam, Bulabog ug Batang Sangi.

Nibahad ang opisyal nga mopasaka og kaso niadtong mga ginikanan nga iyang gihulagway nga pabaya sa ilang mga anak.

“Kapoy baya sigeg rescue uy, unya mobalik gihapon,” dason sa kapitan.

Matod pa nga kadtong mga minor de edad nga katulo na ka higayon nga madakpan sa barangay kasong Child Abandonment ang ipasaka batok sa ilang ginikanan.

Samtang gitahasan ni Mayor Paz Radaza ang City Social Welfare Services ug City Health sa pagsusi sa maong mga minors nga nangasakit sa STI ug ang pakig-alayon sa barangay opisyal sa Pajo.

“There has to be done aron masalbar ning mga bata,” matod pa ni Radaza kinsa nimando sa ubang barangay nga pahugtan ang pagpatuman sa curfew ordinance. /