NAMATAY HUMAN OPERAHI SA VSMMC

Di madawat sa inahan ug asawa sa usa ka guwardya ang iyang kamatayon human operahi sa iyang gal bladder nga aduna’y bato sa Vicente Sotto Memorial Medical Center (VSMMC) sa miaging semana.

Si Chuck Cañizares, 33, taga Barangay Poblacion, dakbayan sa Talisay nga guwardya sa GDS Security Agency sa pantalan.

Si Cañizares namatay niadtong Pebrero 10 sa buntag.

Si Charlyn Cañizares, asawa, nibutyag nga ang iyang bana niadto pang miaging buwan nagsigeg mulo sa sakit sa tiyan hangtod nga ilang gipakonsulta.

Gani, na-admit kini sa pribadong tambalanan sa Minglanilla sulod sa duha ka adlaw ug gitambagan sila nga magpa-laboratory.

Unang giingong acute gastritis ang finding sa mga doktor apan nakita na gyud nga aduna’y bato ang gal bladder sa iyang bana base sa resulta paghiling sa laboratory.

Niadtong Pebrero 7, gi-schedule na sila sa VSMMC nga operahan, busa Pebrero 6 pa lang didto na sila sa tambalanan.

Ang inahan nga si Teresita Cañizares nitug-an nga kumpyansa ra siya sa operasyon apan natingla na lang sila nga ilang nabantayan nga naglisod na ang ilang anak sa pagginhawa.

“Nananghid pa na ang akong anak nga moadto na sila kuyog sa iyang asawa aron magpa-opera. Ang ako pa’ng anak maoy nagdrayb sa motor, angkas ang iyang asawa padung sa Vicente Sotto pero pila ka adlaw, bagahi na lang diay ang akong anak,” matod ni Teresita.

Paggawas sa operating room, maayo pa niya kining gikaestorya apan nianang pagka Pebrero 9, nagmulo na nga lisod na siyang makaginhawa hangtod nga namatay.

Gibutyag sa inahan nga giestoryahan siya sa doktor ug nangayog pasensya nga naa sila’y naputol nga ugat hinungdan nga gipapalit siya og stapler nga maoy mosumpay sa naputol nga ugat.

Si Teresita niingon nga di siya makadawat sa pagkamatay sa bugtong niyang anak ug sa pag-esplikar sa doctor.

“Gi-ingnan man ko nga sorry, Nay, naa mi naputol nga ugat nga nipilit sa gal bladder sa imong anak,” dugang sa inahan.

Nagtuo siya nga ang iyang anak gipraktisan lang hinungdan nga wala matarong sa pag-opera.

Nakigkita silag abogado alang sa legal nga lakang batok sa mga doktor ug ang pagdangop sa National Bureau of Investigation.

Gikatakda nga ilubong nila ang lawas ni Chuck ugmang adlawa.

Aduna kini usa ka anak lalake nga nagpangidaron nag 12 anyos.

Ang tigpamaba sa VSMMC nga si Nonoy Mongaya mitambag sa asawa ug inahan sa pag-adto sa ilang buhatan aron mosang-at og pormal nga reklamo aron usab mahatagan og kahigayonan nga makatubag ang mga nahitungdang mananambal.

“Can you advise the aggrieved party to file a formal complaint at VSMMC for us to answer the allegations raised. Thank you,” tubag ni Mongaya.