Kapulisan mag-roving sa kausalogan sa Chinese New Year

Kapulisan sa siyudad sa Sugbo mag-roving atol sa pagsaulog sa Chinese New Year karong gabii ilabi na sa mga dapit nga dunay mga programa ang mga Filipino Chinese aron malikayan ang mahitabong krimen.

Aron magpabiling luwas ug malinawon ang siyudad sa Sugbo atol sa pagsaulog sa Chinese New Year ang Cebu City Police Office mopakatap og mga pulis aron mabantayan ang mga tawo nga mosuroy panahon sa kagabhion.

Matod ni P/SSupt. Joel Doria, hepe sa kapulisan sa syudad sa Sugbo, nga iya nang gimandoan ang tanang hepe sa 11 ka police station nga ilang bantayan ang ilang dapit aron di malutsan sa mga criminal.

Tanang mobile patrol iyang ipagawas aron suroyon kadtong dunay daghang mga tawo nga magtapok nga nagsaulog sa Chinese New Year.

Duna nay listahan ang CCPO director sa mga programa sa mga Filipino Chinese community nga mohimo og fireworks display nga usa sa ilang patutukan sa iyang mga chief of police.

Makig-alayon usab sila sa Bureau of Fire Protection ilabi na nga dunay mga Sugboanon nga mopabuto usab sa ilang mga fireworks sa ilang kabalayan aron malikayan ang sunog.

“Kung saan yung venue na pagsisilebretan nila maglalagay parin tayo ng pulis duon sa area kagaya ng ginawa natin sa Ash Wednesday na may patrol car tayong pinalabas at pinaantay sa mga simbahan yun may nahuli silang nag-pickpocket,” matod ni Doria.

Wa hinuon mabalaka si Doria sa seguridad sa Sugbo sanglit matag tuig malinawon ang pagsaulog sa Chinese New Year.