Suson mibalik sa iyang katungdanan

Nakabalik na sa serbisyo ang suspendidong kapitan sa Brgy. Labogon, Mandaue City nga si Renato Suson bisan karong Pebrero 28 pa unta mahuman ang iyang 60 ka adlaw nga preventive suspension human nalambigit ang pangan niini sa ghost deliveries sa Material Recovery Facility (MRF) sa barangay.

Ang pagbalik sa gahum ni Suson isip kapitan gibase sa City Legal Office (CLO) sa section 62-C sa Local Government Code nga nagkanayong awtomatikong malibkas sa tanang preventive suspension ang mga opisyal 90 ka adlaw sa di pa ang local election.

Kagahapon sa buntag, pormal nga gi-turn over ni acting kapitan ug first councillor Amado Manatad ang mga yawe sa barangay hall ug ang pagkakapitan ngadto ni Suson.

Mismo ang CLO ang nipasiugda sa turn-over nga gisaksihan sa mga dumadapig sa duha ka kampo.

“Ni-cut short ta (sa suspension) pursuant to section 62-C of the Local Government Code which says during 90 day period prior to an election which is May 14, all preventive suspensions imposed will automatically be lifted,” matod ni Atty. James Allan Sayson sa mga tigbalita.

Dugang niya nga automatikong moasumir sa paglingkod pagbalik sa serbisyo si Suson bisan way order sa mayor.

Kahinumduman nga niadtong Disyembre 28, nipahamtang sa preventive suspension ang CLO batok ni Suson uban sa duha ka kagawad sa barangay tungod sa MRF.

Gawas sa MRF, gireklamo sab si Suson human wa pirmahi niini ang payroll sa mga kawani sa barangay sud sa pito ka buwan ug way tarong nga kolekyon sa basura.

“Meaning under the law, meaning by operation of the law, wa na magkinahanglan og order from the mayor or City Hall, mo-operation of law, mo-assume dayon si Kap natoy,” pahibawo ni Sayson.

Malinawon hinuon ang nahitabong turn-over sa responsibilidad sa pagka-kapitan pasado alas 10 sa buntag.

“Let me just thank Mr. Amado Manatad for being a gentleman, nituman gyud siya sa amoang gisabutang before, di siya mobabag sa time nga mobalik na si Kap Natoy,” saysay ni Sayson.

Dugang pa niini nga bisan nabalik na sa katungdanan si Suson, padayon gihapon imbestigaron sa Sangguniang Panlungsod ang iyang kaso.

Sa milabayng semana, si Suson pinaagi sa iyang manlalaban nisuwat sa CLO kalabot sa balaod mahitungod sa paglibkas sa suspension ug sa pagkadawat sa suwat gitun-an kini sa CLO.

Giangkon ni Suson nga sud sa 10 ka tuig sa serbisyo publiko, nahibaw na siyang daan kalabot sa pamalaod mahitungod sa suspension.

“Manawagan lang sad ko sa mga supporters nga let us set aside the political differences they have para the people will decide it on May. The people of Labogon will decide the issues presented to them on May 14 election,” matod ni Sayson.

Gibutyag niya nga nahibaw na sab sa turn-over ang Commission on Audit ug ang Department of Interior and Logal Government (DILG).

Gipahibawo ni Manatad nga sa 46 ka adlaw nga paglingkod isip kapitan, na-solusyunan dayon niya ang problema nga giatubang sa barangay.

Paambit niya nga nakolekta na niya ang basura sa barangay, nalimpyohan ang barangay hall ug nakasweldo na sab siya sa pito ka buwang suhulan sa mga kawani sa barangay.

Nakapa-budget usab siya og P1 milyon alang sa covered court o gym sa barangay nga magamit sab alang sa emerhensya, pahibawo ni Manatad.

“Di unta to mamalik nga di maswelduhan ang mga tawo kay pobre intawon kaayo na. Basta di na siya mokuti-kuti og pirma basta naa lang siya sa maayong pagsunod sa balaud,” hangyo ni Manatad ni Suson.

Nanghinaot si Manatad nga si Suson ang mopasiugda sa kahapsay og kalinaw sa barangay.

Nipasalig hinuon si Suson niini og nagkanayon nga tutokan niya ang prayoridad sa gobyerno nga mao ang batukan ang drugas ug padayunon ang kahapsay og kalinaw sa barangay.