KINADAK-ANG FOOD COURT SA SUGBO
Kon hilig ka og food trip ug laag, adunay usa ka food court sud sa usa ka mall sa dakbayan sa Mandaue nga angayan nimong bisitahon. Sa pagsud pa lang nimo, susama sa nitaak ka sa suok sa
Venice, Italy o sa nabantog nga The Venetian sa Macau.
Kinsa bay magtuo nga ang kanhi basketball court sa JCentre Mall mao na karon ang nahimutangan sa ilang nag-trending nga Food Central sa social media?
Matod ni John Go, assistant mall manager sa JCentre Mall, nga sukad gi-ablihan nila sa publiko ang ilang Food Central niadtong Enero 31, wa na kini hubsi sa mga tawo ang ilang food court. “Actually pag-start sa construction phase, daghan kaayo og skeptical sa idea. Naabot mi sa point nga ni-doubt mi. Surprisingly, nidaghan ang mga tawo ug overwhelming lang para sa amua,” matod ni Go sa dihang gipangutana kon ilang napanglantawan ang paghangop niini sa publiko. Matod niya, sa matag adlaw, libuan ka mga mall goers ang modalikyat sa “Instagram-mable” nga food court.
Inspirasyon
Nahimong inspirasyon sa maong food court ang The Venetian sa Macau, sigun ni Go.
“Naka-adto man mi sa Macau, so there naka-think mi og inspiration. Nindot man diay no ang feel nga mokaon ka nga di ka makabantay sa time kay ang ilaha didto kay feel nimo murag hapon pirme,” sumala ni Go.
Gawas niini, inspirado sab kini usa ka sikat nga duwaanan sa mga bata didto sa Manila. Kini maoy rason nga light colors sab ang ilang gipintal sa maong food court. “Actually, ang first idea was simple, modern looking lang nga food court. Some members of the team mentioned nga we should make it something like extraordinary para di boring and something nga adtuonon gyud,” matod niya.
Tuig 2014, ang management sa mall nihimo og mall-wide market research kon unsa ang
ganahan sa mga tawo ug ilang nasuta nga ganahan sila og nagkadaiyang pagkaon.
Ang pag-conceptualize lakip na ang pagtrabaho sa food court nilungtad og duha ka tuig. Mga kan-anan ug kapasidad Moabot ngadto sa 24 ka line tenants ug lima ka kiosks ang anaa sa mga 2,000 square meters nga gidak-on sa food court.
Mga nagkalainlaing sikat nga lokal nga pagkaon ilabi na mga Korean ug Japanese foods ang gibida dinhi. Adunay 400 nga seating capacity ang Food Central apan plano sa management sa mall nga pun-an kini og mga 100 ngadto sa 200 ka mga lingkuranan.
Kon gusto mong mag-relax nga busog inyong tiyan, ayaw gyud ninyo sipyata ang pagbisita dinhi. /