Di unta total ban
Nasuko og maayo si Presidente Rodrigo Duterte human niya masayri ang kamatayon sa usa ka overseas Filipino worker (OFW) sa Kuwait nga gisulod og freezer nga gibiyaan sa usa ka abandonadong apartment. Tungod niini, iyang gimando ang total ban sa pagpadala og Pinoy nga mga trabahante ngadto sa Kuwait. Hinuon, wa niya did-i ang mga trabahanteng mamalik ngadto kay igo rang namakasyon dinhi sa nasod.
Samtang masabot ang kasuko ni Duterte kay natural ra kini nga reaksyon sa usa ka lider sa nasod, apan mas makadaut ang kinatibuk-ang pag-ban.
Gibana-bana sa Philippine consulate nga dunay 250,000 ka mga Pinoy nga nagtrabaho sa Kuwait, mas taas itandi sa bana-bana sa kagamhanan sa mao nga nasod nga nagtuong duna lay 165,000.
Matod sa Philipppine consulate, 65 porsyento sa mga trabahante mga domestic helper, kun sobra sa katunga. Ang nahabiling 35 porsyento skilled workers na.
Kon basehan ang mao nga gidaghanon sa mga trabahante, dako ang mawala sa nasod ning pagpatuman sa total ban.
Gitun-an unta sa kagamhanan kon pila ang gidaghanon sa mga Pinoy nga nangabiktima sa pangabuso ug unsa nga nationality ang nangabuso, kay matod sa taho, di Kuwaiti national ang nagpatay niadtong OFW nga gisud sa freezer.
Duna bay silot nga tukma nga gipahamtang ang kagamhanan sa Kuwait niadtong nangabuso? Unsa ka paspas ang aksyon sa kagamhanan sa mao nga nasod?
Di unta total ban ang gipahamtang. Ngano diay kon ang ipadala una didto mao ang skilled workers ug suspensuhon una ang pagpadala og domestic helpers sa mao nga nasod samtang magbutang og mga mekanismo aron sila mas mapanalipdan gikan sa pangabuso?