Once in a lifetime
Nakaapekto gyud sa akong panglawas ang akong kaguol tungod sa paglikay na ni Nick nako ug sa akong kalagot kang Lea. Midaot gyud ko kay nawad-an na man kog gana sa pagkaon. Hangtod gani sa akong pagkatulog, naapektohan sab kay tagdugay kong makatulog. Duna pa gani mga higayon nga buntag na kong makatulog.
Apan wa tingali makamatikod sila si Papa ug Mama sa nahitabo nako kay wa man koy nakita nila nga nahibulong sila sa kausaban sa akong lawas. Wa man gani sila magpangutana nako kon naunsa ko.
Unsaon, ang ilang mga negosyo ra man ang ilang gihunahuna.
Bisan pa man aning tanan, nagpadayon ko sa pag-eskuwela. Wa ko iangin ang akong pag-study sa mga frustrations nga miabot sa akong kinabuhi. Wa na ko motagad kang Lea. Kusmoran ko siya kon magkita mi sa school campus.
Usa ka hapon ana, nagubot ang tibuok campus sa eskol kay dunay mga polis nga nangabot.
Nakalitan ang mga kadagkoan sa university, mga estudyante, mga propesor ug labaw na kami si Lea kay gidakop sila si Carlo ug ang iyang mga barkada. Ug mao na lamay among nahibaw-an nga dealer diay si Carlo ug ang iyang mga barkada og shabu. Dunay mga pakite sa shabu nga nakuha sa mga polis kanila ni Carlo.
Nagduko sila si Carlo pagagi nila sa akong atubangan. Gibati tingali kaayo nila ang dakong kauwaw. Mitan-aw ko kang Lea nga diha ra sab sa akong duol. Miduko siya. Klaro nga nauwaw siya nako. Giduol ko siya. “Unsa na, Lea? Si Carlo ang gusto nimo para nako nga tigbaligya man diay og shabu.” Giyam-iran ko si Lea. “Mao diay nga dato siya kay may illegal man diay nga negosyo nga dakog kita? Na, imo man
kong ibutang sa kadaot, uy!”
Mitan-aw si Lea nako. Naghilak siya.
“Sorry, Yeng. Wa gyud ko kahibawo nga ingon diay ana si Carlo. Daotan man diay tawhana ug ang iyang mga barkada!”
Migakos si Lea nako. Mibakho gyud siya. Way pagpakaaron-ingnon ang iyang pagpangayog pasaylo nako. Naluoy ko sa akong amiga.
“Gipasaylo na tika, Lea. Friend gud ta.”
Nagpahiyomay mi si Lea. Unya nagkuptanay mi sa kamot nga nangadto sa tagsa-tagsa namo ka classroom. (TAPUSON SUNOD GULA)