Training ni Nietes sa US way problema: Villamor

Nahisubay sa saktong dalan ang subsob nga training ni world champion Donnie Nietes didto sa Estados Unidos.

Kini maoy gibutyag sa iyang trainer nga si Edito Villamor sa interview sa Sun. Star Superbalita sa niaging adlaw.

Matod ni Villamor nga hapsay ug nakaadjust na si Nietes sa oras “diri sa Amerika” ug dili na niya problema ang pagpahuway sa saktong oras.

“Adjusted na si Donnie (Nietes) sa iyang timezone ug sa iyiang body clock,” matod ni Villamor.

Ingon ni Villamor nga sa matag buntag, si Nietes ipaubos sa conditioning sa Amerikanhong si Nick Curson samtang sa hapon adto sila sa Wild Card Gym ni Freddie Roach alang sa ilang training ug ingon man pagbansay-bansay sa estratihiya nga ilang gamiton batok sa kontra.

“So far, so good gyud ang gipakita ni Donnie. Sa training ug sparring. Dili sab problema ang timbang kay 7lbs. ra man ang iyang over,’ dugang ni Villamor.

Gitug-an Villamor nga si Brian Viloria kinsa moaway usab dungan ni Nietes karong Pebrero 24, maoy permi ika-sparring ni Nietes.

Hinuon gawas kang Viloria aduna pay laing duha ka mga fighter nga sila si Christian Robles ug Joseph Cuellar nga makadugang sa sparring usab ni Nietes.

Mokabat na ngadto sa 50 ka mga rounds ang na-sparring ni Nietes.

Si Nietes (40-1-44, 22 KOs) modepensa sa iyang International Boxing Federation (IBF) title batok sa mandatory challenger nga si Juan Carlos Reveco (39-3, 19 KOs) sa Argentina ubos sa “Superfly 2” tripleheader sa HBO.