Ramirez may special treatment?; sa ospital ‘gipriso’

Maisip ba nga special treatment ang pagpabilin ni Medellin Councilor Ricardo Ramirez sa usa ka tambalanan sa lungsod sa Medellin sud sa pipila ka buwan, inay sa prisohan sa Bureau of Jail Management and Penology mabalhog samtang gidungog ang iyang mga kaso sa korte?

Si Inocencio de la Cerna, usa sa mga manlalaban sa kanhi mayor sa Medellin, nikompirmar nga nagpabilin pa sa Bogo Medellin Medical Center (BMMC) si Ramirez gumikan sa kondisyon sa panglawas niini nga giingong nihubag ang kasingkasing.

“Yes, August last year, mao tong buwana. Karon, tua pa

didto sa Bomedco and he is still undergoing medical observation,” matod sa abogado dihang nahinabi sa Superbalita Cebu kagahapon.

Si Ramirez nag-atubang og mga kasong illegal possession of firearms and ammunition ug possession of drug paraphernalia.

Usa ka staff sa Bomedco nikompirmar nga naa sa ospital ang konsehal, apan wa na kini mohatag og dugang detalye gumikan sa patient privacy nga polisiya.

Matod ni dela Cerna, tungod sa kalayo sa bilanggoan sa BJMP gikan sa ospital ug way igong medikal nga kapasidad, sila nihangyo sa korte nga magpabilin una sa ospital ang iyang kliyente alang sa follow-up ug hugot nga monitoring.

“Kani gud enlarged heart dili man ni nimo mapaubos, monitoring lang gyud imoha. Mosaka man ang iyang blood pressure unya kinahanglan man gyud ang constant monitoring kay layo-layo ang Bomedco,” dugang ni dela Cerna.

Suma pa niini mosamot ang kondisyon sa iyang kliyente kon adto sa prisohan sa BJMP ibalhog nga iyang gihulagway nga init kaayo ug naghuot.

Usa ka tinubdan ang nibutyag ning mantalaan nga taudtaod na sa ospital si Ramirez ug sama sa na-enjoy niini ang iyang pagka-confine sa BMMC inay sa prisohan sa BJMP.

Apan giklaro ni de la Cerna nga dunay pagtugot sa korte ang ilang gibuhat kay nanginahanglan og medical nga pagtagad ang opisyal.

“Ang among lihok man gud nganong na-confine siya based on a valid court order. Dili gyud ingon nga tumo-tumo, kon mo-question sila ana, they should not be questioning former mayor Ramirez but the court itself. Because the court has found sufficient evidence to let him be confined didto sa BMMC,” pagpasabot ni de la Cerna.

Si Ramirez unang gidala sa BMMC kay nanghubag ang mga tiil, nanglagom ang mga bukton, nisaka ang blood pressure sa 175/110 ug nanakit ang dughan gumikan kay mihubag ang iyang kasingkasing.