Pasagdi ang imong ginhawa
Di malikayan ang pagbati og kasukaon o suka sa kinaon kung magka Appendicitis, kalibanga, sakit ug butod ang tiyan, kasamtangang nag-chemotherapy pagpatay sa cancer, lipong, buyok og gidagat nga paminaw tungod sa liko-liko nga agianan ug hanggap sa isog og makalipong nga baho.
Kung makalingkawas man gani ini, maabtan sab sa maayong balita ug dakong grasya sama sa pagpanamkon maong mag ‘morning sickness’.
Maayo na lang gani kay duna nay tambal nga mapalit sa mga botika og ma resita sa doctor nga maka-alibyo sa pamati ug pa kalma sa tiyan.
Gawas ini, dunay mga paagi nga atong madali-dali paghimo nga naa ra sa atong mga kusina.
Una ang Luy-a. Kining ugat nga pagkaon makatabang pa kalma sa tiyan. Mahimo kining kan-on nga lab-as o imnon, himuong tsa. Isagol ang usa ka kutsaritang Luy-a sa usa ka tasang binukal nga tubig unya patuhupon una og mga 10 minutos una imnon. Mahimong butangan og 3 ka tulo nga dugos (honey) para tam-is.
Ikaduha ang pag-inum og daghang likido (fluids) sama sa tubig, sabaw o sports drinks (Gatorade). Likayi una ang softdrinks, bino, kape og ubang mga Caffeinated nga ma-inum.
Kung nagsabak o nag-chemotheraphy, likayan una ang mga mantikaong pagkaon. Mas maayo ang mga pinabukalan o linong-ag nga pagkaon (lagutmon ug utanon). Maayo sab ang init nga gatas ug linong-ag nga itlog.
Tungod kay mahabwa man ang kinaon inig suka, ayaw gilayon pulihi og daghang pagkaon kay luya pa imong tinai og tiyan. Mas maayong hinay-hinay og ginagmay una ang kaon-on og paundayunan ang ginhawaan aron dili makalitan. Mahimong magkusam-kusam lang usa og mga crackers o biscuits hangtod maulian.
Katapusan ang Aromatherapy. Palayo sa mga isog nga baho sama sa langsa, pahumot, pomada, basurahan o baho sa kasilyas kay makapasamot kini sa kasukaon ug labad sa ulo. Hinuon, abrihi imong bintana para makahanggap og preskong hangin, dagkot og mga humot nga kandila candle, simhot og mga humot nga hapas o prutas nga humot sa ginhawaan.