2 KA PULIS POSITIBO SA DRUGA TAKTAKON

Ipataktak sa Police Regional Office (PRO) 7 ang duha ka police nga nagpositibo sa kinalit nga drug test sa Regional Intelligence Division (RID) sa miaging buwan isip kabahin sa internal cleansing nga gipatuman ni Chief Supt. Robert Guzman Quenery.

Kapin sa usa ka gatus ang gipaubos sa kinalit nga drug test sa mga pulis nga nadestino sa Drug Enforcement Unit sa Cebu City Police Office, Lapu-Lapu City Police Office ug Regional Special Operations Group 7.

Apan sa resulta dunay duha ka pulis nga nagranggo pa og Police Officer 2 ang nigawas nga positibo nga naggamit og shabu.

Ang hepe sa Regional Intelligence Division Police Sr. Supt. Remos Medina nagkanayon nga ila pang ipadala sa Camp Crame ang urine sample sa duha ka pulis alang sa confirmatory test.

Matod niya, kon masuta nga positibo nga naggamit gyud pg illegal nga drugas ang maong mga pulis ipaubos dayon nila sa summary hearing procedures alang na sa pagpalagpot nila sa serbisyo.

“Dalawa sila na nag-positive at kailangan pa natin ipa confirmatory exam duon sa kampo Crame at kung talagang positive sila, ipa imbestigahan na natin at umpisahan na kaagad ang summary hearing at iparelib na kaagad,” matod ni Medina.

Dugang niya nga sa paglingkod ni General Quenery sa PRO 7, nimando dayon kini sa pagpa-drug test sa tanang pulis nga gitahasan nga manakop sa mga nalambigit sa ilegal nga drugas.

Dili maayong tan-awon matod ni Medina nga sila naningkamot nga masumpo ang illegal nga drugas sa Central Visayas apan ang mga pulis utro usab nga tiggamitan niini.

Wala lang una nganli ni Medina kinsa ang maong mga pulis, apan iyang gitug-an nga usa sa siyudad sa Lapu-Lapu ug usa usab sa dakbayan sa Sugbo.

Apan giingong nagduda na ang mga labaw niining mga police officer nga naggamit sa illegal nga drugas sa wala pa sila gipaubos sa drug test nunot sa pamahayag sa mga kauban niini.

Kasamtangan lang una nga gipatrabaho ang duha ka PO2 samtang nagpaabot pa sa resulta sa confirmatory.