TUNGOD KAY KABUS DI MOKIHA SA VSMMC?

Tungod sa tumang kalisod, ang pamilya sa pasyente nga namatay samtang gioperahan sa Vicente Sotto Memorial Medical Center (VSMMC) dili na mopasaka og kaso batok sa ospital.

Ang pamilyang Cañizares nagkanayon nga walay kuwarta sa pagsukol sa away sa korte hinungdan nisanong na lang sa tanyag sa VSMMC nga wala na pabayra sa ilang balanse sa tambalanan nga moabot sa P30 mil.

Si Chuck Cañizares, 33, taga Barangay Poblacion, dakbayan sa Talisay, ug usa ka guwardiya, namatay niadtong Pebrero 10 sulod sa operating room sa naasoy nga tambalanan dihang gipaubos sa operasyon sa gall bladder.

Ang asawa nga si Charlyn ug inahan nga si Teresita Cañizarez pulos ningpasangil nga adunay sayop ang pag-opera sa namatay human usab giingong miangkon ang doktor nga adunay ilang naputol nga dakong ugat.

Kagahapon, gikatakda na untang i-autopsy ang lawas sa namatay aron ilang ikiha ang tambalanan ug ang doktor sanglit sila nagtuo nga gi-praktisan lang ang namatay.

Apan gibutyag ni Teresita nga nahinabi sa Superbalita Cebu nga nahukman sa asawa nga dili na lang ipadayon ang pag-autopsy tungod kay maluoy na siya sa iyang bana nga hiwaan na usab ang patayng lawas ug maluoy na kayo siya niini.

“Ang amoa nakasabot nalang mi iyang asawa dili na mosugot nga i-autopsy kay natabas-tabas na siya og maayo unya tabason na sad. Papahuwayon sa kalinaw dili nalang mi mo-complain,” matod sa inahan.

Matod niya nga igo na kaayo nila nga nakapahungaw sila sa ilang gibati ug napagawas sa mga balita aron ipaabot sa tambalanan nga aduna silay reklamo sa hitabo.

“Ilubong nalang malinawon, Ginuo na lang ang magigo. Siya sad makadawat sa sitwasyon magmalinayon ang pagpahuway dawaton nalang namo,” matod sa inahan.

Dugang niya nga gawas nga nahibawo silang wala silay kuwarta, nagtuo silang wala gayod silay dag-anan kon magkaso na.

Nanawagan siya sa doktor nga nag-opera sa iyang anak nga makonsensya sila ug siya naghinaot nga dili na kini mahitabo sa uban.

Samtang, ang nahitabo sa iyang anak mahimo kining leksyon sa uban nga tawo nga bisan og anaa na sa tambalanan dili pa gihapon kini luwas ilabi na kon anaa sa gobiyerno nga tambalanan.

“Ginuo nalay mag-igo ninyo makonsensya unta mo sa inyong gibuhat. Manghinaot ko nga kadtong nahitabo sa akong anak dili unta mahitabo sa uban kay luoy kayo mi mga pobre,” dugang ni Teresita.

Nasayran nga aduna pa unta silay bayranan sa tambalanan nga P30,000 apan giingong gihatag na ang death certificate nga wala na sila pabayra, sukwahi sa uban nga pabayron uban sa balanse.

“Mao na gyud ang hinungdan nga dili na lang moadto ihatag nalang para dili mangita sa doktor ug dili nalang moreklamo,” panapos ni Teresita.

Ang VSMMC maoy labing dako nga publikong ospital sa Kabisay-an nga gidagsaan sa daghang mga pasyente.