2 PATAY, 10 ANGOL

6-WHEELER TRUCK PUNO OG MGA UTANON NALIMBUWAD SA TOLEDO

Duha ang patay samtang napulo ang angol dihang nalimbuwad ang 6-wheeler truck nga puno sa mga utanon sa Barangay Don Andres Soriano (DAS), siyudad sa Toledo kagahapon sa kaadlawon. Ang Roswel Alma Isuzu 6 wheeler truck nga dunay plate number GGG 639 gimaneho ni Rowel Sumbilon, 49, taga Barangay Santa Cruz, lungsod sa Balamban, nga naa na karon gikustodiya sa Toledo City Police.

Ang namatay dihadiha dayon mao sila si Maria Janila Bantoy, 52, taga Bayong, lungsod sa Balamban, ug Antonieta Villarmia, 53, taga Buanoy, lungsod sa Balamban.

Samtang ang ubang sakay niini nga naangol dali nga gidala sa Vicente Sotto Memorial Medical Center (VSMMC) nga silang Salome Olasiman 51; Elmer Salondagit, 27; Lita Pinol, 51; Engracio Lato, 50; Generose Pinol, 8; Gloria Abalde, 56; Romeo Loyola, 45; Michael Pardillo, 20; ug Alona Albon, 16.

Matod ni SPO3 Jimmylon Cotmaya, imbestigador sa Toledo Police Station, nga nag dulhog ang trak nga gimaneho ni Sumbilon gikan sa Carbon Public Market apan, kalit lang nga nawad-an og brake ang sakyanan nga maoy hinungdan nga misutoy kini sa pagdagan.

Wala na matabang sa drayber sa pag-abot sa likuon nga bahin ug didto na kini natumba diin ang mga sakay nga naa sa luyo maoy nagrabehan.

“Ang initial investigation

namo ni failure ang brake system sa truck mao to na loose

control ang driver,” matod ni SPO3 Jimmylon Cotmaya.

Dugang ni SPO3 Cotmaya nga naswertihan nga walay gikasugat ang maong trak kay kon nahitabo pa matod niini dako ang posibilidad nga madugangan pa ang maangol.

Ang drayber nga natanggong na sa Toledo Police Station niingon nga wala niya tuyoa ang nahitabo ug nirason makadaghan na siya moagi sa maong dapit nga walay nahitabo.

Kasong double homicide through reckless driving and multiple physical injuries ug damage to properties ang atubangon ni Sumbilon nga ipasaka ugmang adlawa.