Nabiktima sa modus sa online selling

Dalaga nabiktima sa modus operandi sa usa ka online selling site sa internet sa miaging Biyernes.

Si Pia Melanie Cabreros, 18, ug nagpuyo sa Lahug, dakbayan sa Sugbo, nakuhaan og P15,300 human kini mi-order og Iphone 7 plus sa Cebu Buy and Sell Gadgets sa Facebook.

Sumala sa kapulisan, ang suspek giila nga usa ka "Tonie Conje" nga maoy namaligya sa giingong cellphone ngadto sa biktima.

Si Conje niingon kang Cabreros nga ipadala daan ang bayad niini sa Palawan Pawnshop una niya makuha ang cellphone.

Mi-chat sab ang suspek ngadto sa biktima nga gamitunon niya ang kwarta aron ibayad sa ospital kay nanganak kini.

Matod sab sa suspek nga madawat ni Cabreros ang Iphone 7 plus sa Sabado sa buntag.

Nisaad ang suspek nga ang bana lang niya ang mohatod sa cellphone ngadto sa LBC aron ipadala na lang kini ngadto ni Cabreros.

Iyang giingnan si Cabreros nga ipakita lang ang resibo niini pinaagi lamang sa ilang pag-chat.

Apan sa paglabay sa pipila ka mga oras human napadala ni Cabreros ang kwarta, wala na kini makadawat og chat gikan sa suspek.

Wala sab siya makadawat og hulagway sa gisaad nga resibo ni Conje.

Nihangyo si Cabreros sa mga suspek pinaagi sa iyang Facebook post nga iuli sa iyaha ang kwarta kay na-dengue sab ang manghod niini.

Ang maong kaso gisubay na karon sa kapulisan pinaagi sa ilang cyber crime team.

Ang awtoridad daan nang niluwat og mga pasidaan bahin sa pagpakigtransaksiyon sa Internet.

Daghan nang susamang kaso ni Cabreros, dunay na-recover apan ang uban wala na mabawi gumikan niining modus sa Internet.

Hinuon, dili tanan ilad sa Internet ug kini na ang nibag-o nga matang o plata-porma sa negosyo apan magbantay lang kanunay.