Mga trabahante sa gipasira nga 2 ka bars paadtuon sa City Hall

Nanawagan si Atty. James Allan Sayson sa Mandaue City Legal Office (CLO) sa apektadong mga trabahante sa gipasirhang bars, Club Hatchi ug The Sentral Bar and Lounge, nga moduol sa city hall aron kini katabangan og pagpangita og trabaho.

“For those affected workers, they can come to the city hall so that we can refer them to Public Employment Services Office (PESO). Maka guide ta nila asa ang mga job opportunities nga vacant and we could also give them skills training,” matod ni Sayson.

Paambit niya nga ang apektadong mga kawani sa duha ka bar sama sa mga waiter, cook, ug cashiers, moduol lang sa buhatan ni Atty. Danilo Almendras sa City Administrator's Office aron kini magiyahan sa pagabuhaton niini.

“Luoy pud. Wa man gud ni sala ang mga waiter and mga cook and cashiers, the city is willing to extend hand,” dugang ni Sayson.

Nalutsan og closure order ang Club hatchi ug The Sentral sayo ning buwana human nakitaan kini'g mga kalapasan sa kagamhanan sa dakbayan ilabi na sa milabayng buwan nga nihimo kini og kalihukan nga way special permit sa city hall.

Naalarma ang kagamhanan sa dakbayan sa Club Hatchi human sud sa usa ka tuig, adunay 66 ka insidente sa pagpangulata nga nahitabo sud sa bar diin 39 porsyento niini nalambigit ang tag-iya ug bouncer.

Atol ning, pagsuwat, padayong gituki ang kaso sa MO2 Restobar sa CLO. Nihimo sab og kalihukan atol sa bespiras sa Sinulog ang MO2 nga way permit sa city hall nga nakamugna og huot nga trapiko sa maong adlaw.

Nasuta sa Superbalita Cebu gikan ni Sayson nga tuig 2016 pa gipangreklamo sa ilang mga silingan establisamento og mga residente ang The Sentral ug Club Hatchi nunot sa kasaba niini.

Gihatagan silag higayon sa CLO para mo-esplikar sa ilang habig apan wa gyud kini nihimo og pag-esplikar.

“We close these bars because of the general welfare clause. Mas maka-ayo sa kadaghanang Mandauehanons if these bars will remain close,” pasabot ni Sayson.

Matod niya nga mahimong makasuwat og rekonsiderasyon ang management sa mga bars nga gipasirad-an apan ang rekonsiderasyon magdepende na sa mayor.

Saysay ni Sayson nga ang nahitabo sa duha ka bar magsilbi unta nga abiso sa ubang mga establisamento sa dakbayan nga motuman sa mga ordinansa, regulasyon ug sa mga balaod.