Mayor Radaza nangutana sa DPWH 7 bahin sa diversion road?

Nangutana si Lapu-Lapu City Mayor Paz Radaza ngadto sa Department of Public Works and Highways (DPWH) kon aduna ba kini diversion road kon sugdan na sa pagtrabaho sa ahensya ang P890 milyones nga tri-level project sa may UN Avenue habig sa dakbayan sa Mandaue.

Sa dihang nahinabi sa mga tigbalita, si Radaza nagkanayon nga nanghinaot siyang lamdagan siya sa maong ahensya kalabot sa detalye sa maong proyekto nga iyang gihangop.

“We welcome such (project) but tan-awon una kon unsay alternate (roads) nga himuon nga dili maka-cause gyud ug grabeng traffic,” matod niya.

Nasuta ning mantalaan nga target sa DPWH nga masugdan ang maong proyekto karong Abril.

Base sa nangaging taho, ang tri-level project gilangkuban sa interchanges ug underpass.

Si Radaza niingon nga ang ubang stakeholders atol sa ilang panagtagbo sa milabayng semana, nangutana kon unsa kalawmon ug kalapdon ang pagkawot sa yuta sa maong proyekto nga magsugod sa bahin sa UN Avenue ug dalan Plaridel.

Kon pakyas sa pagpahibaw ang ahensya sa traffic plan niini sa publiko, hayan mag-antos ang mga motorista ug pasahero nga mag-agian pasud ug pagawas sa Marcelo Fernan Bridge kon gikan sa dakbayan sa Lapu-Lapu.

“We have to have that before the start of the project,” batbat sa mayor sanglit gikatahong mahuman ang proyekto sud sa 3 ka tuig.

Ang pag-ong proyekto magsilbi unya nga gateway sa mga pribadong kompanya.