Hulga ni Duterte
Gibutyag ni Presidente Rodrigo Duterte nga naa sa ikatulong dapit ang region 7 sa kahimtang sa illegal drugs dinhi sa nasod. Nagpasumbingay si Duterte nga ning umaabot nga mga adlaw dunay mangatumba, kana kon di mohunong sa ilang pagkalambigit sa illegal drugs kining mga tawhana.
Dunay dagkong personalidad dinhi sa Sugbo nga ginganlan si Duterte nga hangtod karon wa gihapon bawia niya. Nanghimakak na kining mao nga mga personalidad sa ilang kalambigitan sa illegal drugs.
Isip presidente sa nasod, dunay mga impormasyon si Duterte nga iyang nakuha kalabot sa dagan sa illegal drugs dinhi hinungdan nga iyang gibutyag kini sa publiko.
Kini nagpasabot nga bisan sa subsob nga kampanya batok sa illegal drugs, naa diay gihapon ang daghang mga operator nagpabilin. Hayan giilisan lang ang mga personalidad aron makalusot gikan sa mga awtoridad.
Kon nabuhi ang illegal drugs bisan sa higpit nga kampanya, kini nagpasabot nga duna gihapoy nagsuporta kanila nga lig-on. Tulukibon ang gisulti ni Duterte nga nagpahimangno sa mga pulis nga nalambigit nga magbantay aron di sila magmahay.
Bitaw, nagpadayon pa man gani ang pagpayuhot sa illegal drugs sa mga bilanggoan sa nasod nga giingon nga higpit ang seguridad, unsa na kaha sa gawas ug way nagbantay? Di baya malukop sa pagbantay sa mga awtoridad ang tanang mga dapit.
Niining hulga ni Duterte, hayan duna nay gipanguyawan nga drug personalities, apil na ang kadtong mga awtoridad nga nagpabilin gihapong nalambigit sa illegal drugs.
Basin napikal na ang presidente nga bisan sa iyang pagpahugot sa kampanya, duna gihapoy nangahas sa pagpadayon sa pagpadagan sa illegal drugs.
Magbantay na usab ang mga awtoridad nga nagduwa kay si Duterte, di ra ba mangomedya basta drugas na.