Looking through the eyes of love
Nagsige kog tan-aw kang Divina samtang Nangaon mi sa Mang Inasal sa Colon. Sunday niadtong adlawa. Gikan mi sa simbahan sa Cathedral, mitambong mi sa Misa sa alas singko sa hapon. Wa mi mopauli dayon pagkahuman sa Santos nga Misa. Nagkasabot mi nga manihapon daan sa di pa mi mamauli.
Klasmet mi sa kurso nga among gikuha ug third year na mi. Kami ang labing suod kay nagkauban man mi sa klase sukad pa sa among pagtungha sa first year college.
“Naunsa ka diha, Beth? Sige man gud kag tutok nako. Nain-love ka nako?”
Puwerteng dakoag katawa ni Divina. Nahapak ko siya sa bukton. Nahikatawa sab ko. Unya miinom ko sa juice sa akong baso pinaagi sa straw. Miseryuso ko pagkahuman.
“Kining, Div, motuo ka ba anang giingon nga buta ang gugma?”
“Buta? No. Di buta ang gugma, Beth. In fact, makakita ni. Nganong nakapangutana ka man ana nako?”
Naghinuktok kog kadiyot. Aw, nganong itago ko man sa akong friend? Tug-anan ko siya kay mangayo kog opinyon gikan niya.
“Dugay-dugay na kong nahasol ani, Div. Kuan ba, may lalaki nga super yabang nga nakapalagot nako. Nagpuyo sab siya sa subdivision nga akong gipuy-an sa Mambaling. Ang iyang parents suod nila ni Mama ug Papa.”
“Tungod ba lang ani naglagot ka na niya?”
Miinom sab si Divina sa iyang juice. Nakahuman na mig kaon niadtong tungora.
“Kuan man gud, kon magkaestoya mi, manghambog dayon siya nako. Palitan kuno siyag awto sa iyang mga ginikanan. Sports car nga brand new. Isuroy kuno siya sa iyang Mama ug Papa sa Boracay. Mamakasyon kuno sila sa England ug Los Angeles. Ug daghan pa siyang gipanghambog.”
“Dato ba sila, Beth?”
Morag wa seryusoha ni Divina ang akong giingon niya. Nagkatawa-katawa lang siya.
“Dato gyud. Kapitan sa barko ang iyang Papa nga nagbiyahean sa gawas sa atong nasud, Dollar ang suweldo. Ang iyang Mama presidente sa usa ka dakong kumpaniya dinhi sa Cebu. Ug bugtong siyang anak.”
“Aw, di ka angay maglagot niya. May rason man sab siyang manghambog. Pero sa akong pagtuo, di ang iyang kahambugero ang imong gikalagotan, Beth. Nakagusto ka niya, sure gyod ko ana.”
Wa ko makatingog ug nakatan-aw ko pag-ayo kang Divina. (SUMPAYAN)