SI BESTFRIEND ANG GIKADAYON
Gipangitaan si Josephine “Epen” Pareja og maka-date nga lalake sa iyang suod nga higala nga si Shiela Marie Mabunay.
Apan inay ang lalake nga gipailaila ngadto ni Epen nga si Jared ang makauyab niini, ang
bestfriend na nuon ni Jared nga si Limwel Locaberte, nga kanunay niini nga kuyog kon sila magkita ni Epen, ang nahimo nga hinigugma sa dalaga ug maoy nakadayon.
Sa unang semana sa Nobiyembre 2009, unang nagkaila si Epen ug Limwel.
Si Epen niangkon nga wa siya makagusto ni Jared. Wa usab siya makagusto dayon ni Limwel.
Apan niabot ang panahon nga na-develop ang iyang pagbati kang Limwel sa sige na nila og kita ug panag-estoryahanay.
Si Epen ang unang makig-estorya ni Limwel kay hilumon ug maulawon ang ulitawo.
Niabot ang higayon nga si Limwel nananghid ni Jared nga mangulitawo ni Epen.
Nagsugod kini og pangulitawo sa dalaga pinaagi sa text messaging.
Sama sa ubang nangulitawo, nag-effort usab si Limwel aron sugton sa babaye. Iya kining kuhaon sa Mactan Cebu International Airport diin nag-practicum si Epen.
Sa pagsugat sa Pasko niadtong Disyembre 25, 2009, usa ka matam-is nga “yes” ang nadawat nga Pinaskohan ni Limwel gikan kang Epen nga gipaagi usab sa text message.
Ang duha nagpuyo niadtong 2013 ug gigasahan og usa ka batang lalake, si Kian Immanuel, nga karon 5-anyos na.
Nasundan kini og laing anghel, si Zian Joseph, usa ka tuig ang panuigon.
Sa ilang ika-8 nga anibersaryo niadtong Disyembre 25, 2017, si Limwel, ni-propose kang Epen aron makauban sa tibuok niya nga kinabuhi.
Ang duha gikasal niadtong Enero 27, 2018 sa Church of Mary Coremdemptrix sa Barangay Purok 4, Barangay San Jose, siyudad sa Sugbo.
Ang pagka caring ug maayo moatiman ni Epen ang labing nagustohan ni Limwel. “Nasuhito na pud ko sa iyang batasan, nadawat nako tanan, iyang
positive ug negative side,” matod sa 31-anyos nga bana. Samtang si Epen, 30, na-inlove sa iyang bana gumikan sa pagkabuotan, kugihan ug limpiyado niini.