AHAS TARGET SAB NI CHOCOLATITO
Mipadayag ang kampo ni kanhi four division world champion Roman “Chocolatito” Gonzalez sa ilang interest nga andam silang moaway ni world champion Donnie “Ahas” Nietes alang sa nabakanting World Boxing Organization (WBO) super flyweight world title.
Ang vice mayor sa Managua, Nicaragua nga si Enrique Armas mipadayag nga kon kini mahinayon gusto niya nga adto ipahigayon ang maong away sa modernong Alexis Arguello Sports Center sa Managua, Nicaragua.
Kining maong pamahayag giluwatan ni Armas human sa ilang panagtagbo ni WBO president Francisco Valcarcel,kinsa mitanyag kang Gonzalez nga paawayon alang sa world title sa 115 lbs. nga karon nabakante human ang Japanese champion nga si Naoya Inoue opisyal nga mibuhi sa maong bakus aron mosaka ngadto sa bantamweight division.
Si Gonzalez, gihulagwayng usa sa pinakamaayong “pound for pound” fighter sa tibuok kalibutan, mipahhibawo nga magpabilin gihapon siya sa super flyweight bisan pa man sa kakuwang sa iyang eksperiyensiya sa maong division nga maoy hinungdan sa iyang duha ka sunodsunod nga kapildihan ni Srisaket Sor Rungvisai sa niaging tuig.
Si “Chocolatito”nahimong kampyon sa minimumweight champion (105 pounds) ug flyweight champion (108 pounds) ubos sa World Boxing Association (WBA), ug flyweight ug super flyweight (115 pounds) champion sa World Boxing Council (WBC).
Kini maoy unang higayon nga si Gonzalez (46-2, 38KOs) moaway alang sa WBO world title.
Sa dihang gikuhaan og reaksyon ning mantalaan, si Nietes (40-1-4), ang kasamtanang IBF flyweight champion, mihangop sa maong kalambuan.
“Ok, mas maayu kay ni uyon siya sa akung hagit. Basta ako andam ko mo away sa mga champion sa 115 lbs. Bisan kinsa basta wag lang si batman at superman,” sagul pangumediya ni Nietes kinsa kanhi usab kampiyon sa WBO 105 lbs. ug 108 lbs.
Apan matod ni Nietes nga kon seryuso gyud sila sa ilang desisyon, kinahanglan ang away ipahigayon sa nutral nga dapit o sa Amerika.
“Sa US lang para patas walang labis walang kulang. Kon true champion ug true warrior sila, dili sila palaban sa lugar,” dugang sa 35-anyos nga Nietes.
Sa kasamtangan, subsob karon ang pagpangandam ni Nietes alang sa iyang pagdepensa sa IBF title karong Pebrero 24 batok sa mandatory challenger nga si Juan Carlos Rebeco didto sa Los Angeles, California.
Kini maoy unang pagdepensa sa iyiang IBF title.