Cebu Gov’s Cup volleyball pormal sugdan na karon

Pormal nga sugdan na karong adlawa ang 1st Cebu Governor’s Cup volleyball diha sa Mandaue Cultural and Sports Center.

Mokabat ngadto sa 29 ka mga teams nga nagagikan sa nagkalainlaing lungsod ug syudad sa probinsiya sa Sugbo - 17 ka teams sa North samtang 12 ang gikan sa South.

Molangkob sa North Division Cluster 1 mao ang Mandaue City, Cordova, Consolacion, Liloan, San Francisco, ug Poro samtang magtipon sa Cluster 2 ang Danao City, Carmen, Catmon, Sogod, Asturias, ug Balamban. Ang magtigi sa Cluster 3 mao ang Santa Fe, Medellin, Bogo City, Tabugon, ug Tuburan.

Sa South Division, ang Cluster 1 gisal-otan sa Talisay City, Minglanilla, Carcar City, ug Argao. Anaa sa Cluster 2 ang Dalaguete, Oslob, Santander, Samboan ug Ginatilan, samtang ang Alegria, Moalboal, ug Dumanjug maoy mag-abot sa Cluster 3.

Si Cebu Provincial Sports Commission Executive Director Atty. Ramil P. Abing mibutyag nga sila si Governor Hilario Davide III ug vicegovernor Agnes Magpale ang kompirmadong motambong sa kalihukan nga sugdan sa ala una sa hapon.

Human sa hamubong programa, mosugod ang proper competition diin ang Dalaguete ug Oslob maoy magsangka sa first game samtang magtakos usab ang Cordova ug Poro sa second game.

Ang host Mandaue mosakbang sa San Fernando sa main game.

Mokabat ngadto sa P300,000 nga ganting salapi ang maangkon sa ma grand champion samtang ang second ngadto sa fourth placers aduna usay ganting salapi nga P200,000, P100,000, P50,000, nga pasunod.