GRIFFIN GIKIHA
Wa mohatag og financial support sa kanhi kapuyo
Gipasakaan og kasong palimony si Blake Griffin sa iyang kanhi kapuyo nga si Brynn Cameron, kinsa miangkon nga nauwawan siya sa gibuhat sa NBA star human sila ug ang ilang duha ka anak gibiyaan kay mikuyog ngadto nga sa usa ka model ug reality television star nga si Kendall Jenner.
Ang kaso mihulagway ni Griffin nga usa ka way kasingkasing ug iresponsabli nga pagkatawo nga yano ra kaayong mibiya ug mipakauwaw sa iyang pangasaw-unon human kini dayag kaayo sa publiko nga nakig-date kang Jenner.
Ang kasong palimony mao ang pagdemanda og financial support gikan sa kapuyo niini nga mibiya sa iyang responsabilidad bisan og dili sila kasado.
Si Griffin ug Cameron nagpuyo sulod sa walo ka tuig ug adunay duha ka anak. Gikatakda na unta nga magpakasal sa niaging tuig ang duha bisan pa man og magkaaway-away apan sa kalit lang nakanselar kini human si Griffin didto na mag-ampungad ni Jenner.
Nalatid sa reklamong gipasaka atol sa Valentine’s Day ni Bryan Freedman, abogado ni Cameron, nga si Griffin mipasalig sa makadaghang higayon og igong suporta kaniya ug sa ilang mga anak human siya gitaktak sa iyang tabaho isip sports marketing ug interior design business staff.
Gibutyag usab nga si Camero dili lang kay usa ka inahan sa ilang mga anak kon dili siya usab ang personal assistant, meal planner, scheduler, stylist, publicist, party planner, nurse, nutritionist, branding expert, therapist, cheerleader, basketball ug fitness consultant ni Griffin.
Giyagyag usab sa reklamo nga aduna diay panagbangi si Griffin ug ang kauban niini nga si Chris Paul sa dihang diha pa sila sa Los Angeles Clippers. Si Paul anaa na karon sa Houston Rockets samtang si Griffin gi-trade ngadto sa Detroit Pistons.
Nagsugod ang dili maayong relasyon ni Paul ug Griffin human nagtuo ang nauwahi nga dili na siya ang giilang lider sa Clippers kon dili si Paul na, dugang sa reklamo ni Cameron kinsa miangkon nga siya ang mitambag ni Griffin.
Sa kinatibuk-an, gisaysay ni Cameron nga mas gipalabi pa ni Griffin ang perming pagpakig-uban sa Hollywood celebrity kay sa adlaw-adlaw nga responsabilidad niini isip amahan.
Dugang niini nga samtang minilyon ang kita ni Griffin kinsa nakapirma og $173 million nga kontrata sa niaging tuig, si Cameron ug ang iyang anak naproblema og kuwarta ug wa gani kapuy-an nga nagsalig lang sa suporta sa iyang igsuon.
Wa hinuon ibutyag kon pilay kantidad nga gustong pangayuon ni Cameron apan gituohan nga moabot usab kini og minilyon.