Pag-award og pwesto sa bag-ong merkado sa Tabunok nausab, dili na ipaagi og pag-raffle sa mga aplikante

Nausab karon ang baruganan ni labot sa pagaward sa puwesto ngadto sa mga mamaligyaay sa Merkado sa Tabunok.

Una niini, si Mayor Eduardo Gullas niingon nga i-raffle ang puwesto aron patas ang tanan nga mga manindahay ug mawa ang pagduda nga adunay gipaburan ilabi na kadtong nca supporter sa mayor.

Karong bag-o si City Administrator ug chairman sa gitukod nga market commiittee, Atty. Rudelyn Navarro, niingon nga ugmang adlawa mao ang paghatag sa ilang mga puwesto.

Apan sa unsa nga paagi kini maoy tukion sa committee.

Matod ni Navarro nga adunay sugyot nga hatagan og prayoridad kadtong maayog record sa city hall.

Kini nagpasabot nga kadtong mga karaan na kaayong manindahay aa Tabunok nga maayo mobayad sa ilang buhis way palta sa pag-renew sa ilang business permit maoy prayoridad sa puwesto.

Si Gullas niingon nga uyon siya sa maong hunahuna.

“Consider gyud nila nga katong naka-occupy kaniadto nga walay apan that should be come in to place. Ako nag suggest ana,” matod ni Gullas.

Matod sa mayor, mga maayo ug dili badlungon nga manindahay mao ag kadtong nakabayad sa saktong bayranan ug walay isyu sa iyang pagpaninda sa merkado.

Hinuon iyang gihangyo sa komitiba sa merkado nga unta makasukod na ang manindahay karong petsa 20 sa Pebrero masudlan na sa manindahay ang bag-ong merkado.

Kahinumodoman, ang dako nga orginasasyon sa mga manindahay ilabi na sa fish section mireklamo nga bisan sa paghatag sa ilang temporaryong stall gipali kadtong mga opisyal sa bag-ong natukod nga grupo nga giingon suporter sa administrasyon.

Sila mahadlok nga mao usa kini ang buhaton sa market committee sa puwesto.

Si Atty. Navarro miklaro nga bisan og opisyal sa grupo apan di maayo ang ilang record, di gihapon makapahinulos sa gitawag og prayoridad.