2 PATAY SA BANGGA SA TALISAY

Duha ka lalaki ang namatay human giingong niharos ang bag-o nga multi-purpose vehicle (MPV) sa duha ka nagmotorsiklo ingon man multicab.

Nahitabo ang aksidente sa South Road Properties (SRP) dapit sa Barangay San Roque, dakbayan sa Talisay kagahapon sa buntag.

Ang kapulisan sa Talisay miila sa mga nangamatay nga nagmotorsiklo nga si John Narry Lu, 29, tinun-an sa Cebu Institute and Technology-University (CIT-U) nga taga Barangay Dumlog, dakbayan sa Talisay; ug si Balbinito Dela Cruz Jr., 58, nga taga Camansi, dakbayan sa Naga.

Napagan ang multicab nga gimaneho ni Leopoldo Satentes Jr., taga Deca Homes sa Dumlog, Talisay.

Sigun sa report, ang Toyota Avanza kolor blue gimaniho ni Helen Mahinay, 39, taga Deca Homes, Barangay Tungkil, lungsod sa Minglanilla.

Matod ni PO1 Ruel Detuya, imbestigador sa Talisay City Traffic Section nga si Mahinay gikan sa dakbayan sa Sugbo samtang ang mga nagmotor pulos paingon sa Cebu City.

Sa dihang nagdulhog na si Mahinay sa taytayan nga nagdugtong sa Cebu City ug Talisay matod pa kalit lang nibato o nigahi na ang brake sa Avanza.

Gilubag ni Mahinay ang manobela hangtod nga nisaka ug nitabok ang sakyanan sa pikas lane hinungdan nga nasampak kini sa duha ka motorsiklo.

Sigun sa mga nakasaksi, nangalagpot ang duha nga nagmotorsiklo samtang ang multicab driver nga si Satentes ang nakamenor hinungdan nga naigo ra ang iyang lubot sa multicab sa motor.

Si Gino Mabuyo, sakop sa City of Talisay-Traffic Operation Development Authority (CT-TODA) nanglupad ang duha ka nagmotorsiklo.

Si Lu patay dihadiha samtang si Dela Cruz nadala sa tambalanan apan nakabsan sa iyang kinabuhi.

Samtang ang drayber nga si Mahinay miingon nga disgrasya gyud ang hitabo gani iyang gibutyag nga niadtong Mayo 2017 pa nila nakuha ang ilang sakyanan nga Avanza apan nahibong siya nganong nibato ang brake.

Nisuway unta siya sa pagpangita og kahoy aron adto niya ibangga apan wa siya’y nakitang kahoy hinungdan nga nisaka ngadto sa island ug mitabok siya sa pikas lane.

Ang kapulisan sa Talisay padayon pa sa ilang imbestigasyon.

Sa pagkakaron si Mahinay gitanggong na sa Talisay Detention Cell samtang nagpaabot nga pasakaan og kaso kana kon walay sabot-sabot nga mahitabo.