Kerwin gikombikto sa kalapasan sa gun ban
Self-confessed drug lord sa Kabisay-an nga si Kerwin Espinosa gikombikto sa kasong kalapasan sa election gun ban apan na-absuwelto sa kasong illegal possession of firearms.
Hugot nga gibantayan sa mga operatiba sa National Bureau of Investigation (NBI) ug kapulisan ang kanhi drug lord sa Eastern ug Central Visayas nga si Kerwin Espinosa.
Kini atol sa iyang pagtambong promulgation of judgment sa mga kasong illegal possession of firearms ug kalapasan sa election gun ban sa korte sa Sugbo.
Si Cebu City RTC Branch 23 Judge Generosa Labra nikombikto kang Espinosa sa kasong kalapasan sa Omnibus Election Code labot sa gun ban apan nipawala sala niya sa kasong illegal possession of firearms.
Nag-ugat ang kaso dihang nasikop sa mga sakop sa Cebu City Police Office si Espinosa sa Sugbo naidtong 2010. Nakuhaan siya og drugas ingun man armas sa maong operasyon.
Sa wala pa banhigi-patay kagahapon sa udto, nahinabi pa sa tulo ka mga tigbalita ang abogado ni Espinosa nga si Jonah John Ungab.
Matod niya, na-dismiss na niadtong 2012 ang drug case. Nakapakita sab og lisensiya si Kerwin sa iyang armas hinungdan nga gi-ablsweto siya karon sa korte.
Apan sigun sa prosekusyon, dili luwas si Kerwin sa kalpasan sa election gun ban, kay wala siya makapresentar og permit nga nag-exempt kaniya paghupot og armas niadtong higayona, diin naghinangat ang 2010 national elections.
Si Espinosa nadakpan sa Abu Dhabi naidtong 2016. Dihang nabalik sa Pilipinas, giangkon niya ang iyang kalambigitan sa illegal nga drugas ug nagpabilin pa siya karon sa kostudiya sa gobiyerno.
Matod ni Ungab, anaa ubos sa Witness Protection Program sa Department of Justice ang iyang kliyente, hinungdan nga hugot ang serguridad niini.
Human sa pagpanakaog sa hukom sa iyang mga kaso, wala na mohatag og pamahayag si Espinosa ngadto sa mga sakop sa media. Dali siya gidala sa mga taga-NBI sa sakyanan.