Oyao gipatay tungod sa negosyo?

Gisusi sa kapulisan ang angulo sa negosyo o personal grudge sa posibling motibo sa pagbanhig patay sa kanhi barangay kapitan sa Agus, Lapu-Lapu City nga si Remigio “Bo” Oyao niadtong Dominggo.

Matod pa ni PSupt. Rey Tiempo, Deputy City Director for Admin sa Lapu – Lapu City Police Office nga karibal sa negosyo ang usa sa gitan-aw nga motibo.

Nasayran nga si Oyao adunay patigayon sa quarry ug construction materials.

“We all know that Lapu-Lapu City and Cordova are fast growing (katukoran sa infrastructure), among (pulis) nakita nga grabe ang kompetisyon,” pulong ni Tiempo.

Apan wa isalikway sa mga imbestigador ang hisgutanan nga adunay kalambigitan sa illegal drugs ang pagpatay.

Matod pa sa opisyal nga niining bag-o, wa silay nadawat nga taho nga nalambigit pa ang kanhi kapitan sa drugas nga gikatahong involved kaniadto sa illegal drug trade lakip ang ubang igsuon niini.

“For the past months successive and continuous ang iyang reporting (mga tawo nga iyang nailhan nga nalambigit sa illegal drugs) dire (LLCPO). We can say nga morag, medyo lie-low naman siya,” dason ni Tiempo.

Laing angulo nga tan-awon mao ang posibleng panimalos sa dihang naduhig ang pangalan ni Oyao sa pagpatay sa kanhi kaatbang niya sa barangay nga si former Agus barangay captain Jovencio Lauron nga gi-ambush sa Clarin, Bohol niadtong Mayo 2015.

Atol niining pagsuwat wa pa mailhi ang mamumuno nga giingong nag-atang nang daan sa Sityo Atabay, Agus niadtong higayona dayon sakay sa giparada nga motorsiklo human namusil.

“Planado siya (ambush), professional ang nagtrabaho,” tipik sa pamahayag sa hepe sa City Intelligence Branch, LCPO, PCI Mark Sucalit.