Ulitawo nga guwang gisud og sako, patay

Ulitawong guwang gisulod sa sako ang patay na dihang napalgan sulod sa iyang panimalay mga alas 4:00 sa hapon sa Sitio Kabangkalan, Barangay Villahermosa, lungsod sa Tudela.

Si Felipe Montero Baring, 74, ulitawo ug retired government employee.

Si Welmar Urbita, usa ka panday kaliwat sa biktimang si Baring maoy nakakita sa patayng lawas.

Si Chief Insp. Leo Ty, hepe sa Tudela Police Station nga nahinabi sa Superbalita Cebu, nga si Urbita nagpanday kini sa panimalay sa biktima niadtong Dominggo sa udto.

Nabantayan niini nga wala ang biktima hangtud nga mipauli siya sa pagkahapon.

Tungod sa iyang kabalaka, nagpauban siya sa iyang asawa aron balikon ang tiguwang diin nag-inusara lang kining nagpuyo sa bukid nga duha ka kilometrong gilay-on gikan sa main road.

Apan nakugang sila dihang pagsulod nila sa lawak sa biktima nakita ang patayng lawas nga gisulod sa kolor green nga dakong sako bag.

Dunay samad tinigbasan sa ulo ug sa walang tudlo samtang ang baba niini gibugkusan sa sinena.

Matud pa ni Chief Insp. Ty, nga ongoing ang ilang imbestigasyon pagsuta sa motibo sa krimen.

Nahibaw-an nila nga ang biktima nagpautang kinig kwarta. Pero giingong ang biktima magpahulam og kwarta pero dili kini mokupot niini.

Ang biktima dunay sinaligang tawo nga nagkupot sa kwarta niini nga maoy itudlo usab niya sa mga mangutang nga kuhaon didto ang kwarta.

Hinuon, ang kapulisan nanguha pa og dugang kasayuran ug mga saksi sa kaso sanglit lagyo og silingan ang gipuy-an sa biktima sa bukirang dapit sa Tudela.