SIGE’G PANGUTOT, PILOTO NASUKO
Napugos ang piloto sa pagpahigayon og emergency landing nunot sa pasahero nga di mohunong sa pagpangutot.
Ang pasahero nga nagsige og pangutot sakay sa Transavia Airlines flight gikan sa Dubai paingon sa Amsterdam Schiphol.
Sa taho sa Mirror News ang duha ka Dutch nga naglingkod sunod sa lalake wa makauyon sa sige og pangutot niini apan gasige hinuon siya sa pagpabuhot sa iyang lubot.
Wa ra magtagad ang mga crew sa Dutch low-cost airline sa nahitabo.
Bisan sa pasidaan sa piloto, ang kagubot mitumaw dihang nag-away na ang mga pasahero hinungdan nga gi-divert ang biyahe sa Vienna Airport.
Ang mga pulis misaka sa ayroplano uban sa mga iro ug ilang gipagawas ang duha ka magsuong babaye ug duha ka lalake human ang piloto nagreklamo sa kagubot.
Ang mga babaye misang-at og reklamo sa korte batok sa Dutch budget airline dihang gipagawas sila sa biyahe ug nangangkon nga wa silay gibuhat nga bati.
Si Nora Lacchab, 25, estudyante sa law sa Rotterdam, ug ang iyang wa mailhi nga igsuong babaye, nipadayag nga ang pagpagawas nila sa ayroplano pagpakauwaw kini busa nagpalaban sila sa korte.
Ang duha ka babaye, nga usa ka Dutch ug Moroccan, paingon nang mopauli sa Amsterdam human sa usa ka semana nga holiday sa Dubai.
Matod ni Nora sa mantalaang De Telegraaf nga gikutlo sa mirror.co.uk nga wa silay kalabutan sa kagubot diin nagpalayo sila.
Nitataw siya nga wa silay ideya kon si kinsa ning mga lalake nga nalambigit apan ang demalas lang kay naglingkod sila sa samang lingkuranan ug wa silay gibuhat.
Iyang gitumbok nga ang mga crew maoy nakaingon sa kagubot.
Gipangbuhian na ang mga nalambigit nga mga pasahero ug wa sila gidakop sa mga awtoridad kay wa silay balaod nga gisupak sa Austria.
Apan, di na sila makasakay sa bisan sa tanang biyahe sa Transavia Airlines nga nipadayag nga ang duha ka babaye nalambigit sa kagubot.
Sa pamahayag nga ilang giluwatan, nipadayag ang Transavia Airlines nga giseguro sa ilang mga crew nga hapsay ang biyahe ug sa higayon nga ang mga pasahero may gihimong risgo moapil na sila niini.
Ilang gisuportahan ang ilang mga crew ug piloto sa gihimo nga desisyon niini. /