MITAHI SA KALAMPUSAN
Ang tawo nga may pangandoy ug may pagsalig sa Ginuo bisan kon kuwang sa edukasyon, makab-ot ang kalampusan alang sa pamilya.
Si Remedios Calvo, 68, nagpuyo sa Barangay Bulacao, siyudad sa Sugbo nanginabuhi isip usa ka mananahi.
Sa iyang pagkasastre, gitahi usab niini ang tagsa-tagsa ka kalampusan nga iyang gipangandoy alang sa lima ka mga anak.
Nag-edad pa lang og 18 anyos si Remedios o Reme dihang nakat-unan niini ang basic sa pagpanahi sa lungsod sa Minglanilla.
Ang iyahang Tatay Lucio dili mosugot nga siya manahi kay mas gusto niini nga makahuman siya og eskwela. Apan tungod kay gilay-an si Remy sa ilang eskwelahan, mga dos kilometros gikan sa ilang gipuy-an sa bukirang barangay sa Napo, siyudad sa Carcar, second year high school lang ang iyang natapos.
Tungod sa kalisod sa mga ginikanan, nakahukom si Remy nga ipadayon ang iyang pagpanahi kay gusto niya makakwarta aron makatabang sa mga ginikanan. Siya ang kamanghuran sa lima ka magsuon.
Ang iyang Tatay Lucio ug Mama Rosalia nanginabuhi isip mangabasay og kahoy.
Sa dihang nag-edad og 19-anyos, si Remy nihangyo sa tag-iya sa usa ka tailoring sa Barangay Duljo, dakbayan sa Sugbo, nga tudloan siya unsaon pagtabas ug pagtahi, bugti nga siya ang mobuhat sa mga trabahuon sa balay sama sa pagluto ug paglaba. Kinatibukang, lima ka lainlaing tailoring ug clothier shops ang iyang naagian ug nasuwayan ang pagpanabas, pagtahi og mga polo, mga blouse ug pantalon ug ubang mga pamaagi sa pagpanahi.
Pagkahibawo na niya sa tanan angay makat-on, nagtukod siya og kaugalingon nga shop ug gikuha ang iyang nanay ug tatay gikan sa ilang balay sa probinsya ug dinhi na sa siyudad gipapuyo.
Sa dihang nag-edad si Remy og 25-anyos, naminyo siya ni Guillermo “Ely” Calvo, 72 ug nakabaton sila og mga anak.
Wa molahutay og dugay ang iyang shop ug kini nanira.
Apan nagpadayon gihapon siya sa pagpanahi sa ilang balay diin modumdom ang iyang mga kustomer.
Tungod sa kalisod, usahay mosud-an og kape ug buwad ang iyang mga anak aron lang makaeskwela.
Matag alas 3 sa kaadlawon, mangadye si Remy sa Divine Mercy ug mohangyo sa Ginuo nga makahuman og tungha ang iyang mga anak.
Nangalagad usab siya sa Santo Tomas de Villanueva Parish, Barangay Poblacion Pardo, isip miyembro sa choir sa matag
alas 6 sa buntag nga misa matag adlaw.
Human sa pila ka tuig nga sakripisyo ug kakugi, napahuman sa magtiayong Calvo ang ilang mga anak.
Ang kamaguwangan nga si Remilli Akram, 42, nitapos sa kursong Commerce ug naminyo og usa ka Bahraini; si Liezyl, 38, ang ikaduha ug naminyo na, gradwado sa kursong chemical engineering; si Ryan, 36, ikatulo, gradwado sa kursong electronics engineering ug tua karon manarbaho sa Qatar; si Rey, 29, ikaupat, gradwado sa kursong Hotel and Restaurant Management ug maoy nagpadagan sa negusyo nga bugasan sa pamilya; ug si Wilgere, 29, kamanghuran, ang wala pa makatapos og eskwela.
“Bisan og wa koy grado basta may pangandoy lang ka uban sa pagsalig sa Ginuo ug kakugi, makab-ot gyud nimo ang kalampusan,” pahayag ni Reme.
Karon, anam-anam nga gipadak-an ug gipanindot ni Reme ang ilang balay human mapalit ang luna nga gibarugan niini ug ang kasikbit nga yuta sa miaging tuig.
Nagpahimo usab siya og laing shop pinaagi sa giabangan nga tulo ka stalls sa ikatulong andana sa Pardo Public Market sa Barangay Poblacion Pardo, siyudad sa Sugbo. /